Янъыларда савытлы куьшлерининъ тек разведка билдируьвлер йыюв ман каьрлеп калмай, согыс аьрекетинде де ортакшылык этетаган «Сибирь» казаклардынъ бригадасынынъ аьскершилери Тарумов районынынъ аькимбасы Василий Абдурашидович Джамаловка, районнынъ Хатын-кызлар советининъ председатели Лариса Павловна Гороховага видео-шакырув бойынша шынты разылыкларын билдирдилер. Олардынъ белсенли аьрекетлеви эм келисуьвли уйгынлавлары аркалы буьгуьнлерде согыс спецоперация еринде болган аьскершилерге гуманитарлык юги заман-заманы ман еткериледи. Бизим авыр согыс борышларын толтыратаган аьскершилеримиз уьшин сол коьтергишлев – ол азык-туьлик, йылы кийимлер, техника ман кепленген посылкалар болып калмай, бас деп олар ман оьктемсуьв, эслеринде тутып, аьсиретли саклайтаганлары акында биркитетаган уьйден йылы хабарын алув да болады. Сол разылык тек район етекшилевине тувыл, Тарумов районынынъ аьр бир яшавшысына да каратылган эди. Аьр бир йиберилген посылкалар артында, ярдам йыювында аьр кайсы этилген шакырувга коьтерилген аьдемлер, айтпага, предпринимательлер эм волонтерлар, окытувшылар эм окувшылар, организация куллыкшылары эм тийисли тыншаювда болган ясуьйкенлер турадылар. «Тылсыз фронт болмайды. Бирге биз енъермиз. Енъуьв бизики болаяк», – дедилер аьскершилер, фронт пан тыл арасындагы биргелес аьрекетлевдинъ маьнелигин белгилеп. Сол соьзлер тек согыс кардашлыгын белгилеп калмай, тылда турып, аьскершилерди коьтергишлеп келетаганларга да терен сыйды ашык коьрсетти. Аз болса да, аьр бир коскан уьлис бизди ортак мырадына ювыклатады. Биз коршалавшы йигитлеримиз бен оьктемсиймиз эм онъайлы исине оьз косымын этип келетаганларга разылыгымызды билдиремиз. 

Суьвретте: гуманитарлык юги йиберилуьв мезгили.