Согыс спецоперация басланганлы бери элимиздинъ яшавшылары коршалавшыларымызга кол коьмегин этип турадылар. «Баьри зат та енъуьв уьшин» деген шакырув астында россиянлылар СВО ерине гуманитарлык юклер йибередилер, туьрли акцияларда катнасадылар. Россиядынъ аьр бир муьйисинде«СВО катнасувшыларына – аьскерлик шилтер» акциясы озады. Тувган элимизди коршалав соравларында керекли алатларды кулланув оьз себебин тийдиреди. Шилтерлер аьскершилерди, савыт-садакты, согыс коьликти явдан ясырмага деп этилинедилер. Олар коьбисинше яслардынъ яшавын саклайдылар, оьлимнен куткарадылар.
Шилтерлерди волонтерлар, авыллар, калалар яшавшылары согадылар.
«Шоьл тавысы» республикалык газетасынынъ ис коллективи Терекли-Мектеб авы-
лынынъ яшавшылары уйгынлаган акцияда катнасты. Сондай пунктлар буьгуьнлерде Дагестан Республикасынынъ Ногай районынынъ баьри авылларында да аьрекетлейдилер. Аталыкты коршалавшылары ман бир болып, коьптен бери куьтип турган енъуьвди ювыклатув ниет пен, авылшылар заман тавып, шилтерлерди аьзирлейдилер.
– Биз аьлиги заманга СВО ерине 40 шилтерден артык йибердик. Авылшылар келедилер, савболсынлар, бос заманында келип, сондай ийги иске оьз уьлисин косады-
лар. Аьли редакция куллыкшыларынынъ келгени де кайдай аьруьв, бизге куьнде де Асиет Мансурова, Зарема Толубаева, Насият Аджиманбетова, Курасхан Лейтина, Румия Акбулатова келедилер, бир-эки саьат ислеп кетедилер. Сондайлар, Аллага шуькир,
аз тувыл. Бизге акшалай да коьмек этедилер, сол акшаларга керекли алатлар сатып аламыз. Не болса да, куллык юритилинеди, – деп айтады белсен волонтерлардынъ бириси, ясуьйкенимиз Нурбике Османова. «Шоьл тавысы» республикалык газетасы-нынъ бас редакторы Эльмира Юнус кызы Кожаева Нурбике Османовага коллектив пен йыйналган акшады тапшырды эм ога сондай саваплы исти уйгынлаганына савбол айтты. Н.Османова да редакция куллыкшыларына савбол айтып, сол акша тек ийгиликке кулланаягын белгиледи. Бир кесек заманнынъ ишинде журналистлер эки уьйкен аьскерлик шилтерин согып алдылар, олар тезден баска гуманитарлык юк пен СВО ерине еткерилер.Аьр бир аьскерлик шилтер – бизим коршалавшылардынъ яшавын куткарув эм согыс техникады саклав. Оны согув уьшин коллар эм заман ькерек, бир неше келгенлер сол истинъ сулыбын да аладылар. Кайбиримизге де заман тавып, ийги исти эткен аьдемлер табылганы суьйинишли болады.
Г.Бекмуратова.
Суьвретте: редакция куллыкшылары ислев мезгилинде.