Янъыларда Ногай районынынъ Терекли-Мектеб авыл яшавшысы Никита Уразакаев суьвретши (ол социаллык тармагында Никита Тереклинский деген ат пан белгили) «35 AWARDS» деген савлайдуныялык суьвретшилер баргысы бойынша «100 ийги
суьвретшилери, суьвретлери, сериялары» деген конкурсынынъ «Репортажлы суьврет» деген жанры бойынша енъуьвши болып сертификат иеси болды. Бир йыл артта Никита Уразакаев йыл узагына созылатаган суьвретлер (фото) конкурсына Ногай районынынъ Куьнбатар авылында озгарылган ат шабыс байрамында оьзи соккан эки туьссиз суьвретлерин йиберген эди. Ердесимиз бен йиберилген эки суьврет те сол баргы ман белгиленгенлер. Суьвретши Никита Уразакаевке енъуьвши экенин шайытлайтаган диплом почта ман йиберилди.
Сол конкурста савлай дуныя бойынша юзден артык эллериннен 100 мынъ суьвретшилер ортакшылык эттилер. Никита Тереклинский деп туьрли социаллык тармакларында белгили болган ердесимиз ногай халкымыз арасында белгили суьвретши, Россия Журналистлер союзынынъ агзасы Владимир Якубович Уразакаевтинъ аьелинде тувып оьскен. Оьзининъ атасындай
болып, Никита да Дагестан Республикасындагы Ногай районыннан туьрли репортажлар аьзирлев уьстинде етимисли каьрлейди. Конкурсларда Никита биринши кере ортакшылык этпейди. Айтпага, ол алдын «The best of Russia/Лучшие фотографии России 2012» деген Москва каласында оьткен конкурсында, солай болып, «Вместе Медиа 2024» фестивалинде эм сондай баска конкурсларында да енъуьвши деп белгиленген. Солай болып, ол ИТАР ТАСС билимлендируьв агентствосы ман да белсенли
аьрекет этуьвде оьз усталыгын кулланып барады. Оннан баска болып, ердесимиз оьз атасы Владимир Якубович пен Россиядынъ эм Дагестан ногайларынынъ суьвретлер архивин йыювы уьстинде де онъайлы исин юритеди.
Биз де яс суьвретши эм журналист Никита Владимировичти савлайдуныялык суьвретлер конкурсында уьстинликке етисип, енъуьвши болганы ман ак юректен кутлаймыз. Ога берк ден савлыкты, яшав онъайлыгын, онынъ сол кызыксынувы келеекте де бийикликлерге тийисли болып, оьз емисин бергенин, келеекте де миллетимиздинъ тарихин оьз суьвретлеринде оьмирлетип келгенин йораймыз.
Г.Нурдинова.
Суьвретте: савлайдуныялык конкурста енъген суьвретлер.