Янъыларда Ногай районынынъ Терекли-Мектеб авылынынъ халк яратувшылык орталыгында «2025-нши йылдынъ шоьл тавыслары» деген яс вокалшыларынынъ район бойынша ярысы уйгынланып озды. Сраждин Батыров атындагы сол балалар саният мектеби мен уйгынланган район ярысында Ногай районынынъ туьрли авылларыннан 12 катнасувшылары орыс эм ногай тилинде йырларын йырлав оьнерлери мен сынастылар. Вокалшылардынъ йырлавларына Дагестаннынъ ат казанган маданият куллыкшысы, Сраждин Батыров атындагы Балалар саният мектебининъ етекшиси Анвар Аджибаевтинъ етекшилиги астында сыйлы тоьре агзалары тийисли баасын бердилер. Тоьрелердинъ тамамлары бойынша алты ястан алып тогыз яска дейим биринши балалар куьбинде катнасувшылар арасында А-Х.Джанибеков атындагы орта мектебининъ окувшысы Самира Юсупова – 2-нши орынга, он
ястан алып он эки яска дейим экинши вокалшылар куьбинде катнаскан Карагас авылыннан К.Кидирниязов атындагы орта мектебиннен Дженнет Махмудова эм Уьй-Салган авыл мектебиннен
Алия Торпикова – 1-нши орынга, сол ок балалар куьбинде ортакшылык эткен Карасу авыл орта мектебининъ окувшысы Юсуп Теркеев эм М.Курманалиев атындагы Куьнбатар авыл орта мекте-
бининъ окувшысы Саида Мансурова – 2-нши орынга, А.Х.Джанибеков атындагы орта мектебиннен Нурбийке Отевалиева 3-нши орынга тийисли этилдилер. Солай болып, 13 ястан 17 яска дейим уьшинши балалар куьби бойынша Карасу авыл орта мектебининъ окувшысы Анжела Зарманбетова 3-нши
орынды бийледи. Ярыста енъген яс вокалшылары дипломларынынъ иелери болдылар.
Солай болып, район ярысынынъ енъуьвшилерине аьдетинше тамбыз айынынъ 1-нши куьнинде, Халклар ара балаларды коршалав куьнине багысланып, оьткен байрам концертинде ортакшылык этпеге де ыхтыяр берилди. Сонда «2025-нши йылдынъ шоьл тавыслары» район ярысынынъ лауреатларын С.Батыров атындагы Терекли-Мектеб авыл саният мектебининъ окытувшысы
Боранбийке Коккезова тийисли савгалары ман да белгиледи. Район ярысынынъ енъуьвшилерин
коьрсеткен етимислери мен кутлаймыз, оларга келеекте де оьнерлери артып келип, яратувшылыгында бийик уьстинликлери коьп болганын йораймыз.
Г.Нурдинова,
РФ Журналистлер союзынынъ агзасы.
Суьвретте: А.Зарманбетова.