Савлай Элимиз бойынша ден савлыгына коьре йиберилмеге болатаган 18 ястан 30 яска дейим Россия гражданларын срочный аьскер службасына язлык шакырув шагы юреди.
Янъыларда Кизляр районында яслар куьбин аьскер сырасына шатлыклы аьлде йолга салдылар.
Курал айынынъ 12-нши куьнинде, военкомат еринде аьскерге шакырылганларды йолга салувы шатлыклы аьлде уйгынланды. Аьскер сырасына шакырылганларды йолга салув бойынша соьзлери эм ийги маслагатлары ман Кизляр район администрация аькимбасынынъ биринши орынбасары Тимур Гаирбеков, Кизляр, Южно-Сухокумск калаларынынъ, Кизляр районы бойынша аьскерши комиссары Рамазан Курамагомедов, авыллар аькимбаслары, афган согысынынъ ветераны Ахмед Ахмедов эм ямагат организацияларынынъ ваькиллери шыгып соьйледилер.
Оьз соьзинде олар аьскерге йолланув куьни аьр бир эр борышын толтырмага баратаган ястынъ яшавында маьнели кезек экенин белгилеп оздылар. Баска болып, олар аьскерге йол алган ясларга йогары тамамлы службасын, Россия Федерациясынынъ Савытлы Куьшлеринде оларга оьзлерин тийисли кепте коьрсетип, уьйлерине эрки беркип кайтканын йорадылар.
Ясларды йолга салмага деп олардынъ ата-аналары, кардаш-тувганлары эм дослары да келген эдилер.
Эске туьсирмеге тийисли, Россия аьскерининъ сырасына язлык шакырувы шилле айынынъ 15-нши куьнине дейим озгарылаяк эм кызмет этуьвдинъ болжалы бир йыл болады.
Суьвретте: ясларды аьскер сырасына йолга салув мезгили.