Янъыларда Кизляр районынынъ эм Кизляр, Южно- Сухокумск калалар бойынша военкоматында аьскер сырасына йолланган ясларды озгардылар. Йылы йорав соьзлерин ясларга Кизляр район администрация аькимбасынынъ биринши орынбасары Тимур Гаирбеков, район аькимбасынынъ коррупцияга карсы аьрекет этуьв бойынша коьмекшиси Амирхан Даитбегов, аьскер комиссары Рамазан Курамагомедов, «1999-ншы йыл ополчение ветеранларынынъ союзы» ДРОО-нынъ вицепремьери Ахмедпаша Амирилаев, баска болып, эр борышын толтырмага йолланган яслардынъ кардаш-тувганлары айтып кеттилер. Олар ясларга оьз борышын тийисли толтырып, пайдалы аьскер кеспилерине уьйренип, баьри яктан да беркип, тувган эм оьскен якларына аман-эсен кайтканларын йорадылар.
Солай болып, байрамды анъ алатында ойнавшы Хайбула Хайбулаев эм вокал йырлавшысы Патимат Магомедова ярык оьнерлери мен ярасыкладылар. Кизляр районынынъ сыйлы гражданин, меценат Газимагомед Газимагомедов баьри конакларды да даьмли плов пан сыйлады.
Срочный службага йолланган ясларга сол шатлыклы шарады Кизляр районында «Память гор» ямагат организациядынъ кураторы Халимат Кадиалиева
аьзирледи. Шарадан сонъ, аьскер сырасына йолланган яслар келеекте аьскер боьликлери бойынша уьлестирилеек йыйылыс пунктына йолландылар.
Г.Нурдинова.
Суьвретте: ясларды эр борышын толтырмага йолга салув мезгили.