Элимизди туьрли заманларда, айтпага, аьвелгиде, Уллы Аталык согысынынъ фронтларында яде аьлиги давласувларда коршалавда катнаскан аьскершилеримизге йигитлик, йигерлик эм коркынышсызлык сапатлары дайым келисли болып келеди. Буьгуьнлерде де яс несилге йигитлеримиздинъ коьрсеткен баьтирлиги, шынты патриотизми коьримли уьлги болады.
Солардынъ бириси – Ногай районынынъ Терекли-Мектеб авыл яшавшысы Рахимберди Арсланалиевич Махмутов. Рахимберди 2001-нши йылдынъ канътар айынынъ 7-нши куьнинде Ставрополь крайынынъ Нефтекумск каласында тувган. Ерли мектебти етимисли тамамлаган сонъ, онынъ алдында кайдай кеспиди сайлаякпан, ким болаякпан деген сорав турмады, неге десе ол бала шактан аьскерши кесписин сайлаякпан деп мырад этетаган эди. 2015-нши йыл ол Янъы Уренгой каласындагы коьп кеспилик колледжине туьсип, онда билим алады. Сол йыл ястынъ атасы Арсланали капылыстан дуныядан тайды. Сол йыллар аьелге бек авыр эди. Болса да анасы Зафира кыйынлыкка берилмей, эки аьвлетин аяк уьстине тургызбага, оларга билим бермеге куьш тапты. Коьп заман кетпей, Махмутовлардынъ аьели Сургут каласына коьшеди. Зафира балалар бавында куллык этти. Рахимберди де анасы Зафирага медициналык колледжиндеги фельдшерлик боьлигинде билим алатаган абасы Дианады окытпага ярдамласты, анасын, абасын аявлап, олардынъ акында каьр шегип келди. 2019-ншы йылда Рахимбердидинъ бала шактан эткен мырады яшавга шыгарылды. Сол йыл колледжди тамамлаган сонъ, ол Сургут каласынынъ комиссариаты ман аьскер сырасына йибериледи. Ога Мурманск областиндеги Оленья Губа поселогында орынласкан Тенъиз флот аьскер боьлигинде контракт бойынша мергин-зенитчик болып кызмет этпеге бакты буйырды.
Контракт бойынша кызмет этуьв – ога тек Элин коршалав тувыл, нацизм мен куьрес юриткен оьз ата-бабаларынынъ эстелигине сый этуьв де болады. Ястынъ коьптен эткен мырады толган куьн де етти. Аьскершидинъ кийимин биринши кере уьстине кийген Рахимберди оьзин дуныяда энъ наьсипли аьдем этип сезди. Буьгуьнлерде 25 ясындагы согыс оьзгерисининъ катнасувшысы, взвод командири Рахимберди Арсланалиевич службадагы борышларын яваплы толтырып келетаганы, коьрсеткен йигитлиги, йигерлиги уьшин «За воинскую доблесть», «Участнику военной операции в Сирии», «За заслуги в материально-техническом обеспечении», солай болып, Совет Союзынынъ флот адмиралы
С.Г.Горшков атындагы савгаларына тийисли этилген. Службасынынъ биринши куьниннен алып яс оьзин яваплы, нызамлы аьскерши этип коьрсетип келеди. Алдына
салынган кайсы борышты да тийисли толтырып, кайсы авыр аьлде де шегуьвли эм тез арада токтас алып болувы ман баскаланады.
Етимисли аьскерши буьгуьнлерде билимин Москва каласындагы управление эм асыллав академиясында бардырады. 2024-нши йылдынъ увыт айынынъ 4-нши куьнинде аьскер боьлигининиъ тизиминде Рахимберди Арсланалиевичке аьскершилик борышын толтырмага Сирия Республикасында да йыл ярымга болып келмеге бакты буйырды. Рахимберди
оннан аькелген савгаларын баалы эстелик деп аявлап саклайды.
Солай болып, ердесимизге Сирия еринде аьскершилик етекшилеви мен йогары кеспилиги, халклар ара терроризм мен куьресуьвде коскан уьлиси уьшин берилген Сый грамоталары да бек баа боладылар. Яс болса да, аьскершилик исинде оьзин шынты кеспи иеси этип коьрсетип келген Рахимберди Арсланалиевичтинъ оьз йолдаслары арасында сый-абырайы да уьйкен. 2025-нши йылда алыс Сириядан командировкадан келген йигит юреги мен суьйген Эльзара ман аьел курып бактыларын костылар. Буьгуьнлерде яс оьз ян косагы врач-стоматолог кесписининъ иеси болган Эльзара Муратовна ман Мурманск областининъ Снежногорск каласында яшайдылар, тезден туваяк тунгышларын
аьсиретли саклайдылар. Буьгуьнлерде аьскерши увылынынъ етимислери мен онынъ анасы Зафира, оьгей атасы Курманали, абасы Диана ян косагы Арсен мен олардынъ уьш аьвлетлери оьктемсийдилер. Рахимбердидей йигитлеримиз болган шаклы, Элимиз сенимли колларында. Элимиздинъ йигит эм йигерли патриотларын тербиялаган ата-аналарга уьйкен разылыгымызды билдиремиз. Бизге сондай йигитлердинъ аьр кайсысы да сыйлы эм оьрметли!
Г.Нурдинова.
Суьвретте: Рахимберди Махмутов.