Дагестан Республикасынынъ Ногай районынынъ Терекли-Мектеб авылы, Фёдоровский, Чита, Ростов… Мен аьли келтиретаган географиялык топонимлер бир аьдемнинъ
бактысы ман байланыслы да болады.
Бу куьнлерде ол йигит – эли алдында яваплылыкты алып, оьзининъ ийги патриотлык тербиясын коьрсетип, Аталыкка шапкан явдынъ алдын бувувга турган эр киси. «Шоьл тавысы» республикалык газетамыздынъ бетлеринде согыс спецоперациясы, сонда катнасатаган ердеслеримиз акында аьр кезекли номеринде язады десек, ялган тувыл:
олардынъ йигитликлери, алатаган савгалары, сав-эсен уьйлерине кайтып келгенлер мен йолыгыслар бизди боьтен де суьйинтедилер эм биз олар ман оьктеммиз… Меним аьлиги хабарым яс йигит Азамат Адильхан увылы Ваисов акында, ол яс болса да, бас деген йигитлер саныннан болады, онынъ аты Россия тарихине киргенлер арасында.
Азамат бала шагыннан алып, ногай миллетининъ ийги аьдетлери тутылувды коьрип келген. Айтып озайым, ногайымда ийги аьдетлер аз тувыл, миллетимнинъ йигерли
баьтир касиети Алтын Ордадынъ заманларыннан алып белгили болып келеди, тарихти билген инсан мени мен эрислесуьвге де шыкпас, не шаклы палванлардынъ атлары бесалты оьмирлер артта белгили болган болса да, бу куьнлерге таварых болып еткенлер…
Азамат – йырма ясына янъы толган йигит. Тувган ери – Ногай районымыздынъ ТереклиМектеб авылы, мунда кишкей бала шагы да басланды, мектебке де мунда барды, билим
дуныясына биринши абыт, биринши аьрип, сан… баьриси де кызыклы эди.
Соьйтип, шоьллигимиздинъ яркыраган куьн коьзи астында басланды Азаматка окув йыллары, сонъында, алган билимди элдинъ сырт якларынынъ бираз каты шартларында
кулланмага туьсти, ол аьели мен Ханты- Мансийский автономлы округына коьшип кетеди.
Шоьлликти орманлык эм кара нап авыстырады…
Сургут районынынъ Федоровский поселогында да Азамат, терен билимин коьрсетип, мектебти уьстинликли окып битирди. Шоьлден коьшип барган эр балага янъы ерде ерлесуьв коьп кыйынлык аькелмеди, онынъ каты касиети коьмекши болды ога, дослар да тез тапты, мектеб окув сабакларыннан технический ягы болганлар оны куьшли аьвликтирдилер.
Мектебтен сонъ, Азамат заманын босына йибермеди, ол Сургут каласындагы экономика, етекшилев эм право институтында «тармаклы администратор» специальности бойынша
кеспи алады. Биринши караска, онынъ алган кесписи дав майданнан, ер казбаларда яшавдан айлак узак, ама заман бизге баска затты коьрсетип келеди, аьлиги яшавда, янъы технологиялар заманы да, армиядынъ тактикалык уьстинликлеринде негизли орында цифровой технологиялар, соны ман байланыслы кеспилер боладылар.
2025-нши йылда Азамат кеспили специалист болып шыкты, алдында IT-тармагында гражданлык карьера деп ойланды, ама бактыдынъ буйырганы бар, онынъ – Эли алдында
эр борышымды толтыраман, – деген карары, савлай яшавын туьрлендирди…
Сол ок йылдынъ язында Азамат аьскерлик службасын баслады: уьстинде аьскер кийими, колында савыт, артта – тынышлы яшав, алдыда – Забайкалье, Чита каласыннынъ бир
аьскерлик боьлигинде кызмет кылады.
Аьскер яшавы енъиллерден тувыл деп коьп кере эситкенмиз, ама Азаматка бу ерде кыйын болды деп айтып болмаймыз, онынъ нызамлыгына косылган техникалык илмилер яктан билими ога етекшилери ягыннан тез абырай, сый казанувды аькелди. Ол сол белгили болган, баьри аьскершилер де оьтетаган «учебкадан» сонъ, Ростов областининъ япсарларына йибериледи. Сонда ол коьп затты оьз коьзи мен де коьрди эм «Элиме яв шапканда, мен шеттен карап турып, болмаякпан» деп карар алады – Россия Федерациясынынъ Коршалав министерствосы ман контрактлы ис аьрекетке кол басады.
Аьлиги заманларда Азамат СанктПетербург каласындагы аьскерли академиясына окымага йиберилген. Мунда Азамат аьскерлик материал-техникалык канагатлав
бойынша билимин беркитеди. Аьр кайсымызга да белгили болганлай, ол окымага барган окув ошагы аьскершилик тармагын баьри керекли затлар ман канагатлавшы кузница
болады.
Онынъ алдынгы алган кесписин эсапка алып, аьлиги заманда бардыратаганы онынъ билимине тек билим косаяк эм, согыс спецоперациясы баратаган заманда тыловой эм
логистикалык тармакларда соларды уьстинликли кулланувга амал да береек.
Аьлиги заманда Азаматтынъ ата-анасы элдинъ сырт якларында яшайдылар, ама тамырын мутпайдылар, ийги аьел аьдетлерин де тутадылар.
Бизим халкымызда салдарлы маьнеси болган айтувлар, такпаклар бек коьп, солардынъ бириси – «Шынты эр йигит – мага калай кыйын, авыр, — деп айтпас, ол: «Яв кайда», – деп
сорар.
Оьзининъ бу йигерли абыты ман Азамат та сол айтувдынъ акыйкатлыгын ыспатлайды.
Уьстине кийген аьскерши кийими эм Элин коршалав ога тек соьзлер тувыл… Мен ердесиме тек ден савлыкты, юрген ерде тынышлыкты йорайман, а уьстинликке ол оьзи етер,
мен шекленмеймен.
Бу куьнлерде оьктемсиймиз сондай йигитлер халкымызда болганына, мактанамыз, олар йогары патшалык разылыкка етселер, омырав белгилерге тийисли болсалар. Азамат
Адильхан увылынынъ ийги атын аьли де эситермиз…
Галима Курганова.
Суьвретте: А.Ваисов.
