Район администрациясында болып озган кезекли апппарат
кенъесинде йыйылганлар алдында быйылдынъ 6 айы ишинде районнынъ пожарный боьлигининъ эткен куллыгы акында эсап-беруьв докла-
ды ман Абибулла Яриков шыгып
соьйлеген. Онынъ билдируьви-
не коьре, район еринде от туьсуьвге карсы сув ман канагатланув осал аьлинде. От туьсуьвге карсы 24 коьллердинъ тек 7-ви яравлы деп саналады. Район ериндеги баьриси 72 артезианлардынъ биреви де пожарный автомашиналарына сув алувга
келисли тувыл. Солай ок 14 табиат сув булакларынынъ оьзлеринде де пирс деген зат курылмаган. Пожарный боьлигинде, от туьскен уьй
ишине киргенде тыныс алувга деп туьтиннен саклавшы алатлары баьриси де штатлар 25-тен 20-га кемитилгеннен себеп, «ГО эм ЧС орталыгы» ДР ГКУ-не кайтарылган.
Быйылдынъ ярым йылы ишинде
от туьсуьвлерден тура район пожарниклери 81 кере йолга шыкканы белгиленген. Ол сан былтыргыдан 51,11 процентке коьп. Бес кере от туьсуьвлери болганы эсапка алынган, былтыр сол ок заманга – 6 от
туьсуьвлери болган, ол сан да былтыргыдан 16,67 процентке аз. От туьсуьвлерден келтирилген материаллык йойымы – 20 мынъ маьнет,
былтыр сол ок заманга – 1 миллион 680 мынъ маьнет. Наьсипке, кателенген эм оьлген аьдемлер йойымы
йиберилмеген.
Болса да быйыл 12 кере (оьткен
йыл бу заманга – 9) от туьсуьвлери болган деп белгиленген, ол зат был-
тыргыдан 33,33 процентке артады.
Кенъестинъ куьн йосыгындагы экинши «Ногай районы еринде яз заманында от туьсуьвлерге карсылыкты канагатлав бойын-

ша коьрилетаган шаралар акында» деген сорав бойынша Ногай район администрациясынынъ ГО, ЧС эм мобилизациялык куллыгы бойынша боьлигининъ етекшиси Аслан Ярлыкапов шыгып соьйледи. Ол быйылдынъ 16-ншы март куьнинде Дагестан Оькимети кабыл эткен
«Дагестан Республикасы еринде от туьсуьвге карсы айырым йорыкты токтастырув акында» деп аталган токтасы ман байланыста Ногай
район аькимбасынынъ быйылдынъ 27-нши март куьниндеги токтасына коьре, 2026-ншы йылдынъ 1-нши
апрелиннен 31-нши октябрине дейимги заман болжалында от туьсуьв кавыфсызлыгын канагатлав бойынша дайымлык район оперативлик штабы туьзилгенин билдирди. Сонынъ йыйынларында район
еринде от туьсуьвге карсы кавыфсызлыкты тутув соравлары ойласыладылар.
Алынган токтаска коьре, рай-
он ерлеринде от тутандырмага,
каты уьйшилик кокысларды, орманлык фонды, авыл эм авыллар тоьгерегиндеги ерлердеги оьленлерди якпага ярамайды. Солай ок токтас пан келисли кепте тагы да бир

хыйлы кесек ислер оьткерилген эм оьткерилип турады. (Докладтынъ иштелиги газетамыздынъ келеектеги номеринде баспаланаяк).
Шарада район аькимбасынынъ
орынбасары Мурат Шадиев шатлыклы кепте Терекли-Мектеб авыл яшавшысы, СВО катнасувшысы Рустам Зарманбетовка оькимет сав-
гасын тапшырды.
Кенъестинъ барысында рай-
он ерлериндеги от туьсуьвге карсы кавыфсызлыкты аьр бир яшавшы да тутув, келеяткан сайлавларга аьзирлик коьруьв, авыл аькимбаслары бу соравларга дайым да артык маьне бермеге кереги акында
ой-маслагатлар айтылды.
Соны ман бирге йыйыннынъ
тамамында Терекли-Мектеб авылдынъ орталык Эдиге орамында йол шетиндеги уьш ерде видеокамералары салынганы дурыспа, солардан
тура коьлик айдайтаган коьп район яшавшыларына штрафлар келип турувлары акында соравды районнынъ Ямагат палатасынынъ председатели Эльмурза Саитов коьтерди.
Ол сол камералар ман байланыслы соравларды туьз шешпеге керегин белгиледи. Кенъести юритуьвши район администрациясынынъ
аькимбасынынъ орынбасары Мурат Шадиев сол камералар закон яктан дурыс салынганын эм сога коьре аьр ким де йол юрис йорыкларын сахый тутпага тарыгын айтып билдирди.
М-А.Ханов. 

Суьвретте: Ногай район аькимбасынынъ орынбасары Мурат Шадиев СВО катнасувшысы Рустам Зарманбетовка медаль тапшырды.