Спорт инсанда куьшли касиетлер кеплейди. Сол затты йигитлеримиздинъ туьрли спорт сынасларында енъуьвши болып турганы коьрсетеди.
Абдулвахит Азимов Терекли-Мектеб авыл А-Х.Джанибеков атындагы мектебининъ 6-ншы классында окыйды. Уьйге тек ийги белгилер аькелетаган яс спорт пан да каьрлейди. Яс спортсмен эркин куьрес бойынша секциясында тренери Азамат Кокоевтинъ етекшилеви астында уьйренеди. Туьрли турнирлерде катнасып, Абдулвахит биринши орынларга тийисли болады. Соьйтип, Нефтекумск каласында эркин куьрес бойынша турнирде ортакшылык этип, биринши орынды алган. Сонъында Абдулвахит Черкесск каласында М.Чуковтынъ сыйына озгарылган Савлайроссиялык турнирде куьресип, баргылы биринши орынды алып, Красноярск каласында озгарылаяк Россия чемпионатына путевкады уткан. Ол эркин куьрес бойынша КМС талаплавларын толтырган. Абдулвахит – уьш кере Дагестан Республикасынынъ чемпионы.
Эркин куьрес пен спортсмен 2-нши класстан алып каьр шегеди. Абдулвахиттинъ енъуьвлери – кардаш-тувганларына кайдай уьйкен куьез эм суьйиниш. Онынъ нагашатасы Айдархан Курманбаев районымызда белгили спортсменлерининъ бириси болады, ол ДЮСШ №1 етекшилейди. Айдархан Муллаевичтинъ тербияланувшылары коьплеген спорт ярысларда катнасып, енъуьвши болып кайтадылар. Айдархан Муллаевич, йиени спортты суьйип, эр кисидинъ ийги деген касиетлерин кеплейтаган спорт пан каьр шегетаганына бек суьйинеди эм оьктемсийди.
Биз Абдулвахитке аьли де коьп енъуьвлер йораймыз, спортсменнинъ акында аьли де коьп кере эситермиз деп шекленмеймиз.
Г.Бекмуратова.
Суьвретте: Абдулвахит Азимов.