Янъыларда Нефтекум районынынъ Коясыл авылында аьскершилер коьмилген кардашлык камырынынъ касында балаларга ана тилди уьйретуьв мырадта ашылган «Тувган тил – халктынъ яны» деген клубынынъ катнасувшылары согыс балалары сырасына кирген Ораз Капаевич Аманбаев эм Афган оьзгерисининъ катнасувшысы Арифулла Насыров пан йолыгыс уйгынлап озгардылар. Сол клубтынъ етекшиси Магомед Мавлимбердиевич Манкаев Коясыл авылдынъ тарихи акында йыйылганларга кызыклы хабарлап эситтирди. Ол оьз хабарында ерли яшавшыларына немец-фашистлери кайдай зулмылыгын коьрсеткени акында, айтпага, малын, анъларын эм хатынлардынъ балаларына калдырган ызгы кесек оьтпегине дейим тартып алганлары акында хабарлап эситтирди. Солай болып, клуб етекшиси шарадынъ барысында коьп ясларды эм кызларды душпан эзиетлик бермесин деп, оьлген атлардынъ коьни ишине тыгып, оьлимнен куткарганы акында айтып кетти. Согыстан сонъ Нефтекум районынынъ Коясыл авылынынъ эски мектебининъ еринде янлары курман болган партизанлардынъ эм летчиклердин кевделери йыйылып, ортак камырында коьмилгени, олай болып, ол 1975-нши йылда йигитлердинъ камыры парк ерине коьширилген сонъ, «Бирев де мутылмаган, бир зат та мутылмаган» деген язувы ман эстелик салынганы акында йыйылганларга хабарлап эситтирди. Шара катнасувшылары Магомед Мавлимбердиевичтинъ эскеруьвлериннен 1989-ншы йыл ян берген йигитлердинъ эм сесхабарсыз йок болганлардынъ атлары ман Данък мемориаллык эстелиги салынганы эм сол заманда баьтир-каласы Волгоградтан аькелинген дайымлык оты да ягылганы акында билдилер.
Шарага шакырылган конаклар Ораз Аманбаев эм Арифулла Насыров та, согыс йыллары акында  эскеруьвлери мен боьлисе келип, дав майданларда коьплеген ногай миллетли ердеслеримиздинъ янлары курман болганы акында хабарладылар.
Олар, аьр бир аьскершидинъ уьзилген бактысы – балалардынъ йогарындагы тынышлы коьги эм ер юзиндеги наьсипли яшав уьшин берилгенин белгилеп, яс несилге йигит ердеслеримизди эслеринде сакланъыз, деген тилегин билдирдилер.
Йолыгыстынъ сонъында йыйылганлар ян берген йигитлердинъ сыйына бир такыйка уьндемей турып оларды эскердилер, эстеликке гуьл байламларын салдылар.
Г.Нурдинова.