Сав эл мен бирге Уллы Енъуьвдинъ 81-нши йыллыгын Ногай районында да байрамша белгиледилер.
Сога багысланган митинг алдында Енъуьв Байрагынынъ копиясын согыс спецоперация катнасувшылары, Уллы Аталык согысынынъ ветеранларынынъ уныклары эм немерелери Осман Абдулбариев, Рустам Зарманбетов, Рустам Мустафаев, Солтанбий Балдиев, Эмирлан Амангазиев, Алан Дуйсенбиев, Руслан Сагиндиков, Фазиль Кульчимаев, Расул Зункарнаев, Ислам Джумагишиев коьтерип оьттилер.
Уллы Аталык согыста ян берген ердеслеримиздинъ эстелигинде отты якпага сыйлы ыхтыяр СВО катнасувшысы Оразбай Дуйсенбиевке эм СВО-да ян берген, Эрлик орденининъ иеси Якуб Кулунчаковтынъ анасы – Халимат Кулунчаковага берилди.
Митингти район яшавшыларына каратылган кутлав соьзи мен Ногай район администрациясынынъ аькимбасы Джамалутдин Эсиргепов ашты. Оьз докладында ол Енъуьв Куьнин биз тек белгилеп калмаймыз, ама соны юрегимиздинъ оьзегиннен оьткеремиз деди. «Енъуьвшилер несили алдында басымызды тоьмен иемиз. Олардынъ йигитлиги
оьлимсиз, сол баьтирлик бизим эсимизде, бизим аьеллеримизде эм юреклеримизде яшайды! Аьр бир аьелдинъ оьз согыс тарихи бар, эм сондай тарихлерден бизим ортак эстелигимиз, бизим куьшимиз эм акыйкатлыгымыз туьзиледи. Буьгуьн элимиз алдында янъы шакырувлар шыгып турганда, биз эрлик, тыпаклык эм Аталыгымызга алаллык керегин айлак та оьткир кепте сеземиз. Бизим ердеслеримиз буьгуьнлерде оьз атайларынынъ согыс аьдетлерин тийисли кепте оьр йол ман бардырадылар.
Дав майданларыннан кайтпай калган ясларымызды терен юрек авырувымыз бан эскеремиз. Ол зат сав Ногай районымыз уьшин толыстыргысыз йойым», – деп белгиледи район етекшиси.
Ногай районынынъ Согыс, ис, Савытлы куьшлер эм ыхтыяр саклавшы органларынынъ ветеранлар советининъ председатели Акманбет Сангишиев оьзининъ соьзинде Уллы Аталык согысы сав совет халкы уьшин энъ де авыр сынав болганын белгиледи. Душпанды енъуьвге элимиздинъ баьри куьшлери эм карыжлары йиберилди. Сонынъ сырагысында Уллы Енъуьвдинъ аян шайыты – совет халкынынъ бирлиги эм дуныяда болмас баьтирлиги.
Дагестан Республикасынынъ Халк Йыйынынынъ депутаты, КПРФ Дагестан рескомынынъ секретари, КПРФ Ногай РК 1-нши секретари Мурзадин Авезов республика парламенти атыннан район ямагатын уллы байрам ман кутлады.
Онынъ айтувы ман, Енъуьв Куьни – ол ал деп дав майданында эм тылда Уллы Енъуьвимизди болдырган бизим согыс эм ис ветеранларымыз акында ярык эстелик.
«Буьгуьнлерде Енъуьвдинъ асабалыгы бизди тагы да Элимиз уьшин куьреске шакырады. Тынышлык иси енъер, енъуьв бизики болар деп сенемиз!» – деп белгиледи Мурзадин Авезов.
Район ямагатын солай ок ерли аьскер боьликтинъ рота командирининъ орынбасары Владислав Архипов, Терекли-Мектеб авыл аькимбасы Марат Кулунчаков, СВО катнасувшысы Руслан Сагиндиков, Ногай район Имамлар советининъ председатели Мухтар Мусаев кутладылар. Согыс спецоперация катнасувшысы Арсланбек Култаевтинъ кызы Мадина Култаева Енъуьв Куьни акында ятлав окыды.
Митинг сырагысында район етекшилери эм ис коллективлери эстеликке шешекей байламларын салдылар. Енъуьв куьни байрам концерти, Дагестан Язувшылар союзындагы ногай язувшылар эм шаирлерининъ секциясынынъ етекшиси Гульфира Бекмуратова уйгынлап оьткерген адабият шарасы эм баска маданият-спорт амалламалары ман тамамланды.
М.Юнусов.
Суьвретте: байрамнан коьринис.
