Ногай район орталыгы Терекли-Мектеб авылдынъ Данъклык мемориалында муннан 84 йыл артта Уллы Аталык согысы басланган 22-нши июнь куьнине багысланган эстеликли митинг болып оьтти.

Шарады Ногай район администрациясынынъ аькимбасынынъ орынбасары Рашид Шангереев ашты. Оьзининъ соьзинде ол бизим уьйкен элимизде Уллы Аталык согысынынъ ялыны янаспаган бир аьел де йок болар деп белгиледи. Эстеликли эм кайгырув куьни 22-нши июньде биз тувган Аталыгымызды согысларда баьтирлерше коршалаган, тылда кайратлы куллык эткен аьдемлеримиздинъ йигитлиги алдында басларымызды иемиз. Соннан бери коьп йыллар кетсе де, Тувган Элимиздинъ бактысына нешаклы коьп кайгылар ман сынавлар туьскенин заман бизге бир де муттыртып болмайды эм болмаяк.
Ногай район согыс, ис, Савытлы куьшлерининъ эм ыхтыяр саклавшы органларынынъ ветеранлар советининъ председатели Акманбет Сангишиев тек оьз Тувган Элин тувыл да, Куьнтувар Европадынъ бир неше эллерин де фашизмнен куткарган совет аьскер-
шисининъ йигитлигининъ уллылыгын айырым белгиледи. Онынъ айтувы ман, эгер сол йылларда Совет Союзы болмаган болса, аьлиги Енъуьв куьни де болмаяк эди. Ол аталардан уныкларына – 1945-нши йылдагы аьскершилерден буьгуьнлерде де неофашизмге карсы турган, оьз Аталыгын явдан коршалайтаган россия аьскершилерине коьшкен эрлик пен баьтирликти айырым белгиледи.
Районнынъ хатын-кызлар советининъ председатели, ДР Ямагат палатасынынъ агзасы Асият Манкаева район яшавшыларына биз ата-бабаларымыздынъ йигитлигин тек эси-
мизде тутып калмай, солай ок сол уллы йигитликке тийисли болмага керекпиз деди. Ол буьгуьнлерде эндигиси янъы фашизмнен оьз Аталыгын коршалайтаган аьскершилерге, олардынъ аьеллерине, балаларына аьр биримиз эс бермеге эм ярдам этпеге керегимизди айтты.
Митингке йыйылган яшавшылар эм район ис коллективлерининъ ваькиллери фашизм мен куьресте ян бергенлерди эскердилер эм Данъклык мемориалына шешекей байламларын салдылар.
Бизим хабаршы.