Уьстимиздеги йыл да Дагестан Республикасынынъ Аькимбасы Сергей Меликов ДР Халк Йыйынынынъ алдында оьз Язбасы ман курал айынынъ сонъгы куьнлеринде шыгып соьйлеек.
Быйыл да ол, оьткен йыллардагындай болып, менимше, яшавга шыгарылмага керек янъы миллет проектлерди белгилер эм солардынъ регионнынъ оьрленуьвине кайдай пайдасы барын да анълатар.
Бу йылгы Язбада да, эш бир шексиз, коьп маьнели соравлар коьтерилеек. Коьтерилген аьр сорав регионымыздынъ аьр бир яшавшысына маьнели де болаяк эм кайсысы да аьдем кызыксынувын яклаяк.
Оьткен йылгы РФ Президентининъ Язбасында билимлендируьв темасы айырым орында эди. Соны ман байланыслы болып, регион етекшимиз де сол темады маьнелилер ишине киргизген.
Йылдан-йылга окувшылар оьтетаган сынавлардынъ шартлары туьрленедилер, солардынъ пайдасы болатаганын яде болмайтаганнынъ сырагылары келтирилмеге керек. Сол да яшав бойынша аз маьнели тувыл, билимли яслар – бизим келеектегимиз.
Белгилеп озайым, РФ Президенти болсын, ДР Аькимбасы болсын, аьр кайсысы да элдинъ оьрленуьви уьстинде аьрекет бардырадылар. Коьпмиллетли республикадынъ яшавшылары регион етекшисининъ эткен исин коьредилер эм онынъ юритетаган курсын да яклайдылар.
Оьткен йыллар ишинде Сергей Меликов ДР Халк Йыйыны алдында эткен Язбасында яшайтаган еримиздинъ оьрленуьвине каратылган айлак коьп соравлар коьтерген, бу йыл да сол йыллардан кем болмаягына шекленмеймен. Республикадынъ куьннен-куьнге оьрленуьви бек суьйинтеди, аьли де алдыда ийгиликке сенемиз, ДР Аькимбасы республикамыздагы яшавды ийгилендируьвге коьп куьш аьли де салар. Сол да – беркитилген тарих.
Галима Курганова.