Тагы да бир окув йылы тамамланды, тагы да бир несил яслары яшавдынъ уьйкен йолына шыктылар. Оьзлерининъ мыратларына, яшавда бир орынды алувга ымтыладылар. Артта калды завыклы балалык шагы… Мектеб эсиклери де яй тыншаювга ябылдылар, окытувшылар да енъил тынысларын алдылар.

Патшалык сынавларды да выпускниклер оьттилер. Солардынъ тамамларын келтируьвди Ногай районынынъ билимлендируьв
тармагынынъ етекшиси Амерхан Зейнадин увылы Межитовка тилек салып, оьзимнинъ де соны ман байланыслы соравларымды
берип, хабарласув юриттим.
– Амерхан Зейнадин увылы, мен сизди тагы да бир окув йылынынъ тамамланувы ман кутлайман. Аьли мен билип, сизде
уьстинликлер аз тувыл, солар ман боьлисуьвди тилеймен.
– Элбетте, ногай районымызда бу окув йылды уьйкен уьстинликлер мен тамамладык. Выпускниклеримиз оьзлерининъ терен
билимлерин коьрсеттилер эм алдыда етиспеге болатаган дережеди де салдылар.
– Баслап, газета окувшыларымызга бу окув йылда неше выпускник мектеблерди битиргени акында айтканынъызды суьемен.
– Биз бу окув йылда 11-нши классты окып битирген 141 выпускниклерге орта билим алганлары акында аттестатлар тапшырдык.
9-ншы классты бизде 367 окувшы битирди, оларга болса, ортак негизли аттестат берилди. Аьр кайсысында болса да: 11 классты
битиргенлер эм 9 классты окып тамамлаганлар санында бар эди сондай окувшылар, кимлер тек мектеб программасын аян анълавдан баска болып, оьзлерининъ терен эм туьрли як билимин коьрсеткенлер де…
– Бу соравга айырым маьне берип яваплаганынъызды суьемен, энди оьктемлик сезим тувдырган выпускниклер акында хабарланъызтагы.
– Суьйинемен эм оьктемсиймен, халкымнынъ яслары сондай терен билимге ымтылувын коьргенде. Бу окув йыл Ногай районымыздынъ мектеблерининъ выпускниклерининъ 35-си терен билимлерин коьрсеттилер.
Сол санда 17 выпускниклер – биринши эм 18 – экинши дережели медальлерге тийисли болдылар.
Мен сол окувшылар ишиннен де айырып белгилемеге суьетаганларым да бар. Айтпага, Милана Абдулмусаурова (Кадрия атындагы орта мектебининъ выпускниги) химия (97) эм биология (96) окув сабакларыннан Патшалык сынавларын йогары белгилерге берип, Дагестан Республикасынынъ Оькимети мен беркитилген акшалай баргыга тийисли болды. Бу акшалай баргы бир окув сабактан 100 балл яде эки окув сабактан Патшалык сынавлардан 95-99 балл алган выпускниклерге бериледи.
Милана Абдулмусаурова сол сыйга тийисли болды. 9-ншы класс окувшылары да ОГЭ-ди (основной государственный экзамен) аьруьв оьттилер, Ногай районымыз бойынша баьриси 367 выпускниклердинъ 33-и тек «бес» белгилерге битирдилер эм кызыл туьсли аттестатка тийсли болдылар.
– Амерхан Зейнадин увылы, баска, биринши дережели медальге тийисли болганларга, алган белгиден баскалай коьтергишлев барма?
– Баьриси де, медальге тийисли болган окувшылар да ДР Билимлендируьв министрининъ атыннан Разылык хатларга эм
«Ногайский район» МР администрация аькимбасынынъ атыннан Сый грамоталарга тийисли этилдилер. Солай ок, «Amor Fati»
банкет залы биринши дережели медальге окувды тамамлайтаган выпускниклерге йылсайынлык баргысын (10 мынъ маьнет акша) тапшырды.
– Савболынъыз, Амерхан Зейнадин увылы, заман тавып, меним соравларыма явап бергенинъизге. Мен сизге, сиз етекшилейтаган билимлендируьв боьлигине тек оьрленуьвди, бу йылгы етимислерге етискен выпускниклер саны сизди суьйинткенин билдик, келеекте сол сан тек артканды йорайман.
– Савболынъыз сиз де. Оьзек те, биз етимислер болса куьезленемиз, оьктемсиймиз.
Сол – бизим исимиздинъ тамамы: окытувшыдыкы эм окувшыдыкы. Аьр кайсы енъуьвимиздинъ артында – биргелес куллык.
Ногай районымыздынъ окытувшылары билимли, талаплы балалар ман белсенли ислевге куьшлерин саладылар, коьзлеринде яркын нур ойнаган, билимлге ымтылысы болган бала алдына салынган мыратка йигерли барады, окытувшы болса, ога тек
коьмекши.
– Аман болынъыз, эндиги окув йылы да уьстинликлерге бай болсын!
Хабарласувды Галима Курганова юритти.
Суьвретте: ДР Оькимети мен беркитилген баргыдынъ иеси Милана Абдулмусаурова.