Ногай адабиятында Гульжамал Мингажутдиновна Мурзаевадынъ аты окувшыларга коьптен таныс болып келеди. Ол авыл хабаршысы болып туьрли газеталар ман ярты оьмирин байланыстырып келген, халкын билимлендируьвде уьйкен уьлисин коскан сыйлы аьдемлерининъ бириси.
Гульжамал Мингажутдиновна Ставрополь крайынынъ Куликово-Копани авылында 1919-ншы йыл тувган. Душанбе каласында мамык-кагыт промышленности лаборантынынъ
6 айлык курсын тамамлайды. Ногай кыскаяклы бала шагыннан окытувшы болмага мырат эткен, сол мырады 1938-нши йыл яшавга шыгарылды. Ол Кизляр каласындагы педучилищеге туьсип, оны уьстинликли тамамлаган. Окытувшылык кесписин байырлаган кыскаяклы оьз аьрекетин Кизляр районынынъ Огузер авыл баслангыш мектебинде баслайды. Ога 1943-нши каты, авыр согыс йылында баслангыш классларын етекшилемеге бакты буйырды.
Ялынлы согыс йолларын радист болып оьткен ян косагы Сержутдин Мурзаевичти Гульжамал Мингажутдиновна согыстан саклап, оны аман-эсен йолыгады.
Сол оьткен авыр согыс йыллары акында эскеруьвлерин ол «Во имя чести…» деп атаган китабинде ашык суьвретлейди. Ол авыл, ямагат эм мектеб яшавында белсенли катнасып келген патриот аьдемлердинъ бириси болган. Кайдай ис тапшырылса да, окытувшы оны яваплы,  сонъына дейим еткермеге шалыскан. Ол авылдынъ кыскаяклылар советининъ
председатели аьрекетин ети йыл юритеди. Оннан сонъ комсомол, партия организацияларынынъ секретари, мектебте профком етекшиси аьрекетин уьстинликли толтырып келген. Савлай янын салып, яшавын багыслаган ис аьрекети емисин берген заманы да болды.
Исинде коьрсеткен уьстинликлери уьшин кыскаяклы «ДР-нынъ ат казанган окытувшысы» деген сыйлы атына тийисли этилген, «Оьрметли иси уьшин» савгасынынъ
иеси болган. Коьримли иси уьшин ога коьп кере Сый грамоталары да тапшырылган. 1967-нши йыл билимлендируьв тармагында коьп йыллар минсиз иси уьшин онынъ аты районнынъ сый китабинде орын тапкан.
Билимлендируьв тармагында, ямагат яшавында ол тек белсенли аьрекетши болып калмай, язувшылык оьнери болган, оьз ойы ман мынълаган окувшылар ман газеталар аркалы боьлисип келген хабаршы да болган. 50 йыл узагында ол «Шоьл тавысы» эм Кизляр районларында шыгатаган газеталар, баспа издательстволар ман байланысын уьзбей келген. Газета окувшыларына болса, язувшы кыскаяклыдынъ ятлавлары, хабарлары, макалалары ман таныспага амал болган. Онынъ яшав айкаслары акында язган ятлавлары, хабарлары, макалалары «Моя жизнь», «Во имя жизни», «Счастье Жаминат» деген китаплерге айланып, туьрли йылларда дуныя ярыгын коьргенлер. Гульжамал Мурзаева ногай окувшылары 4-нши класстан сонъ окувын бардырсын деп, коьп кыйынын, куьшин салып келген. Сол маьселе акында йогары органларда, газета бетлеринде коьтеруьви аркалы, Огузер авылдынъ окувшыларына баска ерге кетип окымай, ерли орта мектебте окувын бардырмага амал тувды. Халкын билимлендируьвге савлай яшавын багыслап келген кыскаяклы болып калмай, ол татым аьелин курган наьсипли ана да болады. Ол ети аьвлетлерин оьстирип, яшав йолына онълаган. «Атадан коьрген ок атар, анадан коьрген тон
пишер» дегенлей, Гульжамал Мингажутдиновнадынъ эки уьйкен кызлары, анасынынъ йолын алып, билим тармагынынъ алал куллыкшылары болдылар. Уьйкен аьелдинъ бийкесине «Материнство» савгасы эм «Ана оьрмети» деген lll дережели ордени де тапшырылган.
Онынъ атын буьгуьнлерде Огузер авылынынъ орамы оьктемли юритеди. 2001-нши йыл Гульжамал Мурзаева арамыздан кешкен болса да, сыйлы окытувшыды, белсенли аьрекетшиди авылынынъ яшавшылары, мектеби дайым йылувлык пан эсинде саклайдылар, эткен иси, кыйыны аьр кайсысынынъ юрегинде ярык эстелик болып яшайды.
Г.Рамазанова.
Суьвретте: Гульжамал Мурзаева.