РФ Федераллык Йыйынынын Государстволык Думасынынъ депутаты Султан Хамзаев май айынынъ сонъгы куьнинде Махачкалада тарих паркында оьткен «Дагестаннынъ аьдет-йорыклары» аьел фестивалинде ортакшылык этти эм, шарадынъ майданларынынъ бирисинде шыгып соьйлеп, федераллык дережеде Ана тил куьнин токтастырмага эм оны Дагестаннынъ халк шаири Расул Гамзатовтынъ тувган куьнине рас белгилемеге маслагат берди. Онынъ айтувы ман, ана тил куьнин токтастырув соравын тек ортага салып ойласувдан баска
болып, оны тийисли нормаларга коьре йорыкластырув да керек болады.
Айтып озайык, Расул Гамзатов – белгили совет эм Россия шаири, коьплеген сыйлы атларга эм йогары савгаларга тийисли этилген Дагестаннынъ халк шаири. Аты савлай дуныяга белгили уллы шаирдинъ сыйына РФ Президенти Владимир Путиннинъ Указы ман 2023-нши йыл Расул Гамзатовтынъ 100 йыллыгына багысланып, кенъ аьлинде белгиленди. «Депутат Султан Хамзаевтинъ
федераллык дережеде ортага салып карамага керек деген ой-маслагатын
дурыс коьремен эм толысынша хошлайман. Биз – ногайлар, элимиздинъ
туьрли регионларында шашырап конып, яшасак та, халкымыздынъ байлыгы – ана тилин саклав эм армаганда оьрлендируьв уьшин баьри куьшимизди салмага тийислимиз», – дейди Дагестаннынъ халк шаири Анвар-Бек Култаев.