Янъыларда Терекли-Мектеб авылынынъ сыйлы ясуьйкени Эсенбийке Юмагельди кызы Туркменбаевага 90 яс толды.
Ис ветераны – Ногай районынынъ Терекли-Мектеб авыл мектебинде, 94 йыллар бойы ана тилинде шыгатаган «Шоьл тавысы» газетасынынъ тарихинде онда белсенли куллык этуьви мен оьз ызын калдырганлардынъ бириси. Асылы ман Эсенбийке-абай – Нариман авылыннан, мунда ол Юмагельди эм Мухминаттынъ аьелинде 1935-нши йылдынъ тамбыз айынынъ 13-нши куьнинде тувып-оьскен. Ерли мектебте билим алган. Толеген деген ногай йигит пен танысып, араларында суьйим сезимлери энген яслар бактыларын байлап, яс аьел курганлар. Куьн сайын сол аьел беркип, ызлы-ызыннан ети аьвлетлери де тувдылар. Куллыксуьер, эткен исине яваплы, каьмбил кыскаяклы, бир истен де коркпай, кайсы исте де белсенлик коьрсетип, эткен куллыгын коьримли толтырмага шалыскан.
Аьел бийкеси Эсенбийке-абай сол йылларда районымызда шыгатаган газетадынъ типографиясында наборщик эм йыйыстырувшы ис аьрекетин толтырып келген. Газетады колы ман йыйнап, эртен 8 саьаттен алып туьнги эки саьатке дейим олтырган заманлары эсли кыскаяклыдынъ тап буьгуьнгидей эсинде. Ис аьрекетинде эсте сакланган коьп кызыклы аьллер, оьзгерислер онынъ эсинде калганлар. Соьйтип, ис ветеранымыз, боьтен де, биринши Май байрамы алдында шыккан номерин аьзирлевин дайымга эсинде саклады. Сол куьнди Эсенбийке-абай булай эскереди:
– Исимиз эрте битсе, кызлар ман концертке бармага да мырат эттик. Тек ис йолдасымыз Алиш Аджибаев уьйкен кыйын салып йыйган газетамызды билмей ерге туьсирип тоьгеди. Соннан себеп газетады сол куьн бизге кайтадан йыймага туьсти. Аьзирленген газетага кол басылмай, бирев де кайтпайтаган эди. Исимизди тамамлап, неше саьатте кайтсак та, эртенъги сегиз саьатке куллыкта болмага тийисли эдик, неге десе ана тилимиздеги газетамыз юмада уьш кере шыгатаган эди. Соьйтип биз, газета куллыкшылары, янъы номерди йыймага аьзир болганмыз, – дейди оьз эскеруьвинде Эсенбийке-абай. «Шоьллик маягы» газетасынынъ редакциясында ис ветеранымыз 1970-нши йылларга дейим каьрлеген. Сонъ ясуьйкенимиз районо, финотдел, КГБ район боьлигинде йыйыстырувшы болып ислеген. Кайсы ис аьрекетинде де кыскаяклы уьйкен яваплылык, сахыйлык пан баскаланмага шалысты. Онынъ кайсы ис басында да арувды-талувды билмей, белсенлик коьрсетуьви туьрли Сый грамоталарына, Разылык хатларына тийисли этилген.
Ян косагы Толеген мен курган татым аьелинде ети аьвлетлери оьсип, аяк уьстине турдылар. Туркменбаевлердинъ булытсыз яшавына Эсенбийке-абайдынъ ян косагы 48 ясында авырувдан дуныядан кешуьви уьйкен мунъшылыгын косты. Эри тайганда, олардынъ кишкей кенжапайлары Бариятка янъы ети яс толган эди. Амал йок, яшав керек эди. Ялгыз оьзине куьндиз куллыкта ислеп, ети аьвлетлерин канатынынъ астында яшав кыйынлыкларыннан коршалап, ана суьйимин берип, аьр кайсысын да аьдуьвлеп оьстирип, яшавдынъ уьйкен йолына онъламага туьсти. Буьгуьнлерде олардынъ аьр кайсысы да анасынынъ тоьгерегинде айланып, оьз яшавындагы етимислери мен куьезлендирип, ийги соьзлерин, йылы сезимлерин коьрсетип, анасынынъ яшавына йылувлыкты аямай савкатлап келедилер.
Ол оьзининъ кишкей увылы Каирбек эм Гульнара келини мен яшайды. 90 яска толган ясуьйкенимиз куьнин бос йибермеге суьймейди. Онынъ колы ман оьстирилген туьрли туьсли шешекейлер, туьрли емисли тереклер яшаган азбарды коьрклендиреди.
Ис ветеранымыз оьзининъ 90 йыллык мерекесин аявлы аьвлетлери, балдан таьтли уныклары эм йиенлери, аьзиз немерелери тоьгерегинде хош алды. Сол тувыл ма аьдем уьшин наьсип дегенинъ!
Биз де, газетамыздынъ ис ветеранын 90 йыллык мерекеси мен кутлай келип, ога берк ден савлык, узак оьмир, йогарында таза эм ашык коькти йораймыз.
Г.Нурдиннова.
Суьвретте: Эсенбийке Туркменбаева.