Быйыл язда республикамыздынъ бас каласы Махачкалада согыс спецоперациясынынъ баьтир катнасувшыларынынъ сыйына ашылган баннерлери арасында бизим ердесимиз, Эрлик орденининъ иеси Амирхан Мурзагельдиевтинъ де баннери салынган.

Сол баннерлер баьриси де каладынъ Биринши Петр орамында орынластырылганлар.
Амирхан Камиль увылы россия аьскерлери юритип турган согыс спецоперациясына былтыр куьзде оьз ыхтыяры ман кеткен эди. Ога аьскершилик бактысы «Вагнер» ЧВК аьскершилерининъ сырасында дав ислеринде катнаспага буйырды. Авыр эм каты кавгаласув ислерининъ бирисинде йигерли ердесимиз оьзининъ фронт йолдасларын душпан куьллелериннен коькиреги мен ябып ян берген.
Амирхан оьзи Ногай район орталыгы Терекли-Мектеб авылында тувып-оьскен. Ол Дагестан Республикасынынъ Халк язувшысы, Россия Язувшылар союзынынъ агзасы, халкымызда айтылган Бийке Кулунчаковадынъ уныгы эди. Терекли-Мектебте Абдул-Хамид Джанибеков атындагы орта мектебин окып кутарган. Мектебтен сонъ Пятигорск каладагы Сырт-Кавказ федераллык университетинде окып, инженер-механик кесписин алган. Сонъында ол Россия Савытлы куьшлер сырасында оьзининъ эр борышын намыслы кепте толтырган.
Амирхан Мурзагельдиевтинъ эстелигине республикамыздынъ бас каласында салынган баннер халкымызда «Йигит оьлсе де аты мутылмас» деген соьзлерди аян шайытлайды. Дагестаннынъ аьлиги замандагы согыс спецоперациясында баьтирлик коьрсеткен увыллары арасында бизим авылдасымыздынъ йигитлигине де орын табылганы миллетимиз уьшин айырым оьктемлик эм сый болады. Олардынъ атлары оьмирлерге яшаяк!
Бизим хабаршы.
Суьвретте: Махачкалада йигит ердесимиз А.Мурзагельдиевтинъ эстелигине багысланган баннер.