Ногай районында Язлык эм ис байрамы шатлыклы аьлде белгиленди. Бу куьн район орталыгындагы Ф.Капельгородский паркында Ногай патшалык халк саз алатлар оркестрининъ меканынынъ касында митинг озды. Оны Халк саз алатлар оркестрининъ солистлери, ДР ат казанган артистлери Рашид Менлигулов эм Зульфия Аджигеримова юриттилер.
Район орталыгынынъ яшавшыларын эм конакларды биринши болып район аькимбасынынъ орынбасары Рашид Шангереев кутлады. Ол бу куьнлерде тувган еримиздинъ онъайлыгы уьшин яваплы куллык этетаган авыл хозяйствосынынъ исшилерин, билимлендируьв, савлык саклав, маданият эм баска маьнели тармакларынынъ куллыкшыларына разылык билдирип, язлыктынъ йылувы ман бирге оларга янъы куьшлер эм ойлар келгенин йорады.
Сонъ Терекли-Мектеб авыл аькимбасы Марат Кулунчаков, район Ясуьйкенлер советининъ председатели Шатемир Мунгишиев, Согыс, ис, Савытлы куьшлер эм ыхтыярсаклав органлар ветеранлар советининъ председатели Акманбет Сангишиев, Россия «Чернобыль» Союзынынъ Ногай район боьлигининъ председатели Руслан Кунтувганов шыгып соьйледилер.
Яс несилди патриотлык яктан тербиялав исине коскан уьйкен уьлиси уьшин Шатемир Мунгишиев КПРФ Ногай райкомыннан Акманбет Сангишиевке «80 лет Победы» медалин тапшырды.
Митингтан сонъ озган байрам концертин ДР Халк артисти Яхья Кудайбердиев ашты. Оны ман бирге йырлары ман бизим коьнъилимизге коьнъил костылар Патшалык халк саз алатлар оркестрининъ солистлери Рашид Менлигулов, Зульфия Аджигеримова, Кабират Кудайбердиева, Мурат Байгазиев, Адильхан Менласанов, Кызыл-Гуьл Аджимуратова эм баскалар.
Байрам куьнинде Шора Баьтир атындагы орталык стадионында спорт шаралар да оьттилер.
Нурият Кожаева.