2026-ншы йылдынъ курал айынынъ 10-ншы куьнинде Краснодар крайында А.И.Проценко эстелигине багысланып, настольный теннис бойынша Савлайроссиялык турнир тамамланды. Дагестан Республикасынынъ Ногай районынынъ Терекли-Мектеб авылынынъ яшавшысы, яс ердесимиз Каримулла Яриков (суьвретте ортада) йогары уьстинликке етисти бу турнирде, ол биринши орынга тийисли болды. Аьлиги заманда Каримулла Черкесск каласында 9-ншы номерли гимназиясынынъ 10-ншы классында окыйды. Каримулла окувдан бос заманда тренировкаларга барады. Яс спортсмен Карашай-Шеркеш Республикасынынъ настольный теннис бойынша йыйылма командасынынъ ваькили болады.
Айырып айтпага керек, бу енъуьв Каримуллага курал айынынъ ишинде ялгыз уьстинлик тувыл. Бир юма алдын ога КарашайШеркеш Республикасынынъ чемпионы деген сыйлы ат берилди. Соьйтип, бир юмадынъ ишинде яс спортсмен региональли чемпионатта эм Славянка-на-Кубани еринде ярысларда катнасып, Черкесск каласынынъ «алтын ракеткасы» болды.
«Шоьл тавысы» республикалык газетасынынъ коллективи Каримулла Яриковты ак юректен кутлайды енъуьвлери мен, аьли де коьп бийикликлер, окувында уьстинликлер йорайды.

Э.Кожаева, «Шоьл тавысы» республикалык газетасынынъ бас редакторы.