Янъыларда Тарумов районында кырк кийик айында РФ Федераллык Йыйынынынъ Государстволык Думасына депутатларды сайлавларга аьзирлик коьруьв эм озгарув болжалында ямагат эм от туьсуьвге карсылык этуьв кавыфсызлыгын канагатлав ман байланыслы соравларга багысланган ис кенъеси болып оьтти. Кенъесте ыхтыяр йорыгын эм сайлав исин уйгынлавга яваплылы ведомстволардынъ бас ваькиллери ортакшылык эттилер: Тарумов районынынъ ТИК председатели Салус Рахматулаев, район администиациясынынъ кавыфсызлык эм АТК аьрекетин уйгынлав бойынша боьлигининъ куллыкшысы Али Алиев, Россия МВД Тарумов районы бойынша начальниги Абдула Гасанов, солай ок Южно-Сухокумск каласы, Ногай эм Тарумов районлары бойынша Тергев салув аьрекети эм профилактикалык куллыктынъ 9-ншы номерли боьлигининъ ваькили Надыр Омаров. Ойласып каралмага салынган соравлардынъ бас темасы – сайлавлар оьтеек 18-нши, 19-ншы эм 20-ншы сентябрь куьнлеринде кавыфлыклардынъ алдын шалув эм гражданлардынъ кавыфсызлыгын канагатлав бойынша коьрилмеге тийисли шаралар акында эди. Кенъеске шакырылган экспертлердинъ аьр бириси оьзи яваплылык тутув ягы бойынша аьрекет этуьв акында теренлетип анълатты. Сайлав участоклардынъ террористликке карсы коршаланув, ямагат йорыгын канагатлав, солай ок от туьсуьвге кавыфсызлык нормаларын тутув соравлары каралды. Кенъес катнасувшылары белгилегенлей, баьри куьш структураларынынъ эм ерли самоуправление органларынынъ биргелес уйгынлав аьрекети сайлавларды парахатлык эм кавыфсызлык аьллерде оьткеруьвдинъ негизи болады. Йолыгыстынъ экинши кесегинде Тарумов районынынъ ТИК председатели Салус Рахматулаев эм комиссиядынъ системный администраторы Макар Капиев участок сайлав комиссиялар агзалары уьшин семинар озгардылар. Онынъ бас темасы Россиядынъ Орталык сайлав комиссиясынынъ «ИнформУИК» федераллык проекти болды. Белгилев керек, «ИнформУИК» проекти сайлавшыларга озгарылаяк сайлавлар акында яшайтаган ери бойынша билдируьвге каратылган. Яшавшыларга РФ Государстволык Думасына депутатларды сайлавлар акында актуальли билдируьвди еткеруьв уьшин проект бойынша гражданлардынъ уьйлерине бараяклардынъ куллык этуьв йосыгына айырым эс каратылды Солай ок кенъес барысында тавыс беруьв бирлик куьни – 2026-ншы йылдынъ 20-ншы сентябринде оьтеек сайлав кампанияды уйгынлав, кадрлык эм карыж ягыннан канагатлав соравлары ортага салынып каралдылар. Кенъес сырагыларын келтире берип, Салус Рахматулаев тавыс беруьв бирлик куьнине аьзирлик планга коьре баратаганын белгиледи. Салынган борышларды сапатлы толтырув уьшин комиссиялар агзалары керекли инструкциялар алдылар.