Оьткен саьли куьн кенъес озгарылды. Онда «Ногайский район» МР Депутатлар Йыйынынынъ председатели Р.Байманбетов, авыл поселениелер аькимбаслары, кайбир республикалык эм район организациялар етекшилери, солай ок ямагат организациялар басшылары ортакшыладылар.
Кенъести район етекшисининъ орынбасары Мурат Шадиев юритти. Ол йыйылганларды Россия предпринимательство куьни мен кутлады эм соьзди муниципалитет администрациясынынъ экономикалык боьлигининъ начальниги Кызбийке Тангаевага берди. Ол район етекшиси Джамалутдин Эсиргеповтынъ атыннан предпринимательлер – «Конак Уьй» комплексининъ директоры Гульзара Эсмухамбетовады эм туькенлер иелери Арсланбек Рахмедовты, Анвар Абубекеровты кеспи байрамы ман кутлады эм Разылык хатлар тапшырды.
Сонъ йыйылганлар алдында оьз доклады ман Россия ОМВД Ногай районы бойынша ГИБДД ДПС боьлигининъ тамада инспекторы Эмир Картакаев шыгып соьйледи. Онынъ соьзлерине коьре, быйылдынъ ызгы доьрт айлары ишинде Ногай район еринде 4 авариялар болганы регистрацияланып, 3 аьдем ян берген эм 4-ви кателенген, олардынъ ишинде – 17 ясына етпеген 1 аьдем.
Кенъесте солай ок йол аьли мен байланыслы маьселелер ортага салынып каралды, айтпага, йолларда тийисли белгилер, курыкларда фонарьлер йоклыгы эм сондай баска соравлар акында соьз коьтерилди.
Армаган Ногай ЦРБ врач-терапевти Отебийке Зарманбетова йыйылганлар уьшин артериялык кан давлениесининъ йогары кьтерилуьви акында шара озгарды.
Э.Кожаева.