Толтырма билимлендируьв куллыкшысынынъ кеспи куьни белгиленип басланганлы бу йыл уьшинши йыл болады. Бу байрам куьни Россия элинде «Окытувшы эм насихатшы йылы» (2023 йыл) деп белгиленген заман токтастырылган. Соннан бери календарь бойынша бу байрам да бар. Ногай районымызда толтырма билимлендируьв мен каьр шегетаган, коьп йыл узагында аьрекет бардырып келетаган Балалар яратувшылык уьйи, алдынгысы Пионерлер уьйи болады. Мунда Ногай районымыздынъ бир неше несили билим алган, оьзлерининъ бар оьнерлерин оьрлендиргенлер. Аьли уьшин мунда куллык этетаган аьдемлер саны коьп тувыл, болса да, сулыплы етекшиси Людмила Темирбек кызы Аракчиевадынъ кол астында бек талаплы эм оьз ислерин яны ман суьйген педагоглар аьрекет бардырадылар. Олардынъ тербияланувшыларынынъ ийги атлары тек район кезегинде тувыл, республикада да йогары сахнадан айтылады. Бу куьн оьзлерининъ кеспи байрамларына багысланган кызыклы шарады уйгынлап, Ногай район балалар яратувшылык уьйининъ залында, сол айтылган учреждениединъ куллыкшылары озгардылар. Мунда келген конаклар: Ногай район Билимлендируьв тармагынынъ етекшиси Амирхан Межитов, Ногай район Профсоюз организациясынынъ етекшиси Арслан Бакиев, авыл ерлеринде толтырма билим беруьвши окытувшылар, тренерлер, тербияланувшылардынъ ата-аналары эм баскалар. Шарады аьлемет давыслы тербияланувшылар Малика Хасбулатова, Динислам Буланбаев басладылар эм юриттилер. Байрам шатлыгын балалар яратувшылык уьйинде коьп йыллардан бери аьрекетлейтаган «Юлдызлар» биюв ансамбли ашты (етекшиси Рабият Елакаева). Келген конакларды Людмила Темирбек кызы Аракчиева хош коьрип алды. Ол оьзининъ соьйлевинде уьйкен суьйими эм разылыгы ман аьр бир ис ветераннынъ атын атады, бу куьн конак болып келгенлерди сахнага шакырып, аьр бирисине оьз ойы ман боьлиспеге амал да берди, гуьл шешеклер де савгаладылар. Байрам ис тамамларды келтируьвсиз оьтпейди, бу шарадынъ барысында коьплеген грамоталар да тийисли аьдемлерге берилдилер. Ногай район аькимбасынынъ тапшырмасын Амирхан Межитов толтырды, ол баслап Д.Эсиргепов атыннан, сонъ оьзининъ атыннан толтырма билимлендируьв беретаган педагоглардынъ ийги исин белгиледи. Бу куьн сол тыныш тувыл исти бардыратаган коллективке Ногай район бойынша профсоюз организациясынынъ етекшиси Арслан Бакиев Сый грамотасын тапшырды. Биргелесип, яратувшылык исти бардыратаган ис йолдасларынынъ кыйынын Людмила Аракчиева оьзи де грамоталар ман белгиледи, олардынъ етимислери акында да билдируьвлер мен боьлисти. Шатлыклы шарада йыйылганлардынъ коьнъиллерин Балалар яратувшылык уьйининъ тербияланувшыларынынъ биювлери, йырлаган йырлары, ногай саз алатында ойнавы, кувыршаклардынъ шымылдык уьстинде соьйлевлери коьтерди. Шарадынъ барысында атааналар атыннан ис коллективке разылык та билдирилди. Бу куьнги байрамга багысланган шара бек кызыклы оьтти, йыйылганларда балалардынъ колы ман этилген бисерден ярасык гуьллерди, ойыншыкларды, тагы да аьдемди сукландыратаган затларды коьрмеге амал да болды. Балалар яратувшылык уьйи – аьлемет дуныя, мунда кайдай оьнерди де коьрмеге боласынъ – коькте тувган юлдызлардан алып, шоьллигимде оьсетаган ярасык ак шобанларга дейим… Бу куьнги кеспи байрам сыпыра тоьгерегинде таьтли зыяпетлерди буйырув ман, толтырма билим беруьвши педагогларга тек уьстинликлерди йорав ман тамамланды. 

Галима Курганова. Суьвретте: байрам шарасында.