Уьстимиздеги йылдынъ шилле айынынъ 8-нши куьнинде Аьел, суьйим эм алаллык куьнин байрамшылавда Ногай районында яшав йолында алаллык эм аралык сыйлав ман баскаланган ян косакларын оьрметледилер.
Сол байрам куьнинде айырым эс «бриллиант» мереке иелери – 60 йыллар бирге бактыларын байлап келген Эсманбет Оразбаевич эм Сайдат Исмаиловна Куруптурсуновларга да каратылды. Куруптурсуновлардынъ аьел иелерин сол маьнели байрам куьни мен кутлав шатлыгында сыйлы конаклар, айтпага, Ногай район етекшисининъ орынбасары Рашид Шангереев, администрация ислерин кесек заманга юритуьвши Зухра Аджиманбетова, Ногай районында яшавшыларды социаллык ягыннан коршалав управлениесининъ алдышы специалисти Мавлизат Бальгишиева, район администрация специалисти Венера Хаджимурадова катнастылар. Рашид Шангереев, мерекешилерди кутлай келип, сондай аьеллер ямагатымыздынъ негизи болатаганын белгиледи. – Аралык шынты суьйим, алаллык эм ювыклар акында каьр шегуьв – ол аьеллердинъ ысланатаган дайымлык баалыклары болады. Сизинъ йолынъыз – ол яслар эм кызлар ызламага болаяк коьримли уьлги, – деди ол. Мерекешилерге шатлыклы аьлде «Суьйим эм алаллык» деген медали, баска болып, ДР Ис эм социаллык оьрленуьв бойынша министрининъ исин кесек заманга юритуьвши М.Кихасуров эм Ногай район администрация аькимбасы Д.Эсиргепов атыннан Сый грамоталары тапшырылды.
Буьгуьнлерде Терекли-Мектеб авылында Куруптурсуновларды татым эм уьйкен аьеллердинъ бириси деп таныйдылар. Олардынъ куьезин доьрт аьвлетлериннен тувган 10 уныклары эм 9 немерелери арттырадылар. Мерекешилердинъ уьш несили бир йыйылган аьел байрамлары шатлыклы эм бирлик аьлде озып келеди.
Элимиз дайым берк, куллыксуьер, сенимли аьеллер мен ысланып келеди. Эсманбет Оразбаевич эм Сайдат Исмаиловнага карап, наьсип – ол тек уьстинлик болып калмай, куьнсайынлык ис, шыдамлык эм бир-бирисин аявлап саклап болув экенин де аян анълайсынъ. «Шоьл тавысы» газета редакциясынынъ ис коллективи баьри кутлавларга да косылып, аявлы мерекешилерге берк ден савлык, куьшкуватты, онъайлыкты йорайды.
Дайым уьйинъизде тынышлык, ийгилик, онъайлык болсын.
Аьелинъиз аьли де коьп йыллар бойы тоьгеректегилерди коьнъиллендирип келсин!
Г.Нурдинова.
Суьвретте: Куруптурсуновлардынъ аьелине савга тапшырылув мезгили.
