Ногай район орталыгы Терекли-Мектеб авылында аьдетли Авыл куьни болып оьтти.

Эртенъги 8 саьаттен алып байрам программасын ерли эм ювыктагы районлардан келген фермер эм байыр ярдамшы хозяйстволарынынъ ваькиллери аштылар. Олар авыл яшавшыларына, рынок бааларыннан тоьмен этип эт, суьт продуктларын, ясылша эм емис саттылар. Айтпага, Курах районыннан келген ЛПХ басшысы (атын эт тукымын айтпага уялды) алма, кертпе, наралма, айва, шетлевик эм с.б. затлар сатып турды.Тагы бир ЛПХ басшысы – конъысы Ставрополь крайынынъ Петров районынынъ Светлоград каласыннан келген Виталий Иваненко сатувшыларды оьз балшыбынлары аьзирлеген балы ман суьйинтти. Бал продукциясы ман хозяйствосында ол 17 йылдан бери аьрекет этеди. Куьндизги 10 саьатте авылдынъ Шорабаьтир атындагы орталык стадионында район ортакбилимлендируьв школаларынынъ окувшылары арасында енъил атлетика яктан йогарыга каргув бойынша район рекордсмени Сейдахмет Амановтынъ эстелигине багысланган 1-нши спартакиададынъ ашылувы болып озды. 1970-нши йыллардынъ басында онынъ бийикликке каргувдан коьрсеткен 1 метр 75 сантиметр сырагысына аьлиге дейим бирев де етиспеген. Сонынъ акында айттылар спартакиада алдында Ногай район администрация аькимбасы Джамалутдин Эсиргепов, район Ветеранлар советининъ председатели Акманбет Сангишиев, спорт ветераны Сталинбек Муллаев, район Ямагат палатасынынъ председатели Эльмурза Саитов, район билимлендируьв боьлигининъ начальниги Амирхан Межитов. Олар яс спортсменлерге йогары уьстинликлерди, дослык сезимин беркитуьвди йорадылар. Оннан сонъ район халк яратувшылык уьйининъ янындагы ашык сахнада Авыл куьнининъ ашылувына багысланган байрам митинги болып оьтти. Мунда район орталыгынынъ яшавшыларын шатлыклы аьлде Ногай район администрациясынынъ аькимбасы Джамалутдин Эсиргепов кутлады. – Буьгуьнги куьн район орталыгында тувган эм оьскен, мунда яшайтаган эм ислейтаган аьр кимди де бирлестируьвши куьн. Биз баьримиз де район орталыгы ман ортак бир тарихимиз, аьдетлеримиз эм, энъ маьнелиси, ата юртымызга суьйимлигимиз бен бир-биримиз бен байланыслымыз. Бизим буьгуьнги ортак бир борышымыз – бизге ясуьйкен несил берген баьри де ийги асабалыкты саклав. Аьр биримиз де районды оьрлендирмеге, коьрклендирмеге, оны яшамага эндиги де онъайлы этпеге керекпиз. Мен ойлайман, буьгуьн сонынъ уьшин коьп зат этилинеди эм ол зат оьзининъ аьруьв емислерин де береди. Мине янъыларда бизим окувшы ясларымыз «Сактыян топ – школа футбол лигасы» деп аталган Савлайроссиялык ярысларда 7-нши орынды бийлегенлер. Мен соны аьруьв спорт сырагысы деп санайман. Бизде, районда, аьлиги заманда 7 школада спорт майданлары, футбол стадионлары бар эм солар буьгуьнлерде бизим балаларга оьрленмеге толы кепте яхшы амаллар бередилер, – деди район етекшиси. Сондай ийги йоравларын авыл яшавшыларына Ногай район Ямагат палатасынынъ председатели Эльмурза Саитов та айтты. Джамалутдин Эсиргепов бу ерде Терекли-Мектеб авыл аькимбасы Марат Кулунчаковка согыс спецоперациясын юритуьвге салдарлы ярдам эм демевлик этуьви эм бизим аьскершилерди тийисли кепте аьзирлеви уьшин аьскер боьлигининъ командири Протопоповтынъ атыннан келген Разылык хатын тапшырды. Авыл етекшиси Марат Кулунчаков оьзи атыннан солай ок баьри де тереклимектебшилерди бу байрам куьни мен кутлады. Онынъ соьзи мен, авылымыздынъ энъ де уьйкен байлыгы – ол куллыксуьер, оьзининъ тувган ата юртын аявлап билетаган алал юрекли аьдемлер. – Ким оьзининъ аьр куьнлик иси, каьри эм юрек йылувлыгы ман авылдынъ оьрленуьвине эм коьркленуьвине оьз косымын этетааган баьрисине де таза ниетим мен разылыгымды билдиремен. Айырым муьсиревлик соьзлеримди ясуьйкен несиллерге акылбалыклыгы эм яшав сулыбы, яс-явкага куваты, белсенлиги эм бизим киши ата юртымызды ийгилендирмеге шалысувы уьшин каратаман, – деп белгиледи район орталыгынынъ басшысы. Марат Кулунчаков яс футболшылар командаларын: Терекли-Мектеб авылдынъ кеделерин эм Карагас авылдынъ кызларын – бизим республикады Савлайроссиялык «Сактыян топ – школа футбол лигасы» деген ярысларда аьруьв кепте коьрсеткенлери уьшин сахнага коьтерилмеге шакырды. Йыйылган ямагат яс спортсменлеримизди каты карс кагувлар ман йолыкты. Митингтен сонъ байрам программасын Ногай районынынъ белгили йырлавшылары, яс артистлер оьз концерт номерлери мен армаган бардырдылар. М-А.Ханов. Суьвретлерде: район орталыгында – Авыл куьни.