Янъыларда, 2026-ншы йылдынъ 3-нши июнинде, Дагестан Республикасынынъ Ямагат палатасында коьшпели малшылык аьрекети мен каьрленетаган ерлерде орынласкан яшавшылар пунктларын эм кепленген поселениелерин официаллык статуска тийисли этуьв акында сорав ортага салынып ойласув ман байланыслы болып шара озгарылды.
Онда Ногай районынынъ делегациясы ортакшылык этти: район аькимбасынынъ биринши орынбасары Рашид Шангереев, район Ямагат палатасынынъ председатели Эльмурза Саитов эм районнынъ Хатын-кызлар советининъ председатели Асият Манкаева.
Йыйылганлар алдында РФ Государстволык Думасынынъ делегаты Сайгидпаша Умаханов шыгып соьйледи. Ол карарды кабыл этип алувда ерли яшавшылардынъ ойтоктасларын эсапка алув приоритетли болмага
кереклигине эс каратты, соравды шешуьв мен байланыслы кайдай абытлар этилсе де, яшавшылардынъ, бу ерде яшайтаган эм аьдеттеги иешилик аьрекетининъ айырым белгилерин билетаган несиллердинъ ой-карасларына негизленмеге кереклигин белгилеп.
Ногай районынынъ делегациясы атыннан шыгып соьйлеген Эльмурза Саитов кайбир актуальли соравларды коьтерди эм оларды шешуьвдинъ йоллары акында маслагат берди.
Шара катнасувшылары авыллардынъ ыхтыяр аьли мен байланыслы соравларды ортага салып ойластылар. Статустынъ йоклыгы патшалык буйымлар эм социаллык колтыклав ман пайдаланмага оравлыклар тувдырады.
Статус болганы поселениелерди региональлик реестрлерине эм оьрленуьв планларына киргистпеге, инфраструктуралык проектлердинъ финанславын канагатламага, муьлктинъ ыхтыярлык кеплевин енъиллетпеге эм коьшпели малшылык тармагында каьр шегуьвшилердинъ ортак яшав дережесин арттырмага эп туьзеди.
Маьселеди ортага салып ойласувдынъ сырагылары бойынша Дагестан Республикасынынъ профильли ведомстволары уьшин ой-маслагатлав туьзилген.
Сонынъ иштелигине аян положение мен келисте поселениелердинъ ыхтыяр статусын келтируьв бойынша йол картасын, исти юритуьв эм поселениелердинъ, олардынъ инфраструктуралык керексинуьвлерининъ баасы ман туьрли яклы инвентаризациясын озгарув уьшин ис куьбин туьзуьв киргистилеек.
Бизим хабаршы.