Уллы Аталык согысынынъ йоллары узак эди. Кайдай кыйынлы болса да, олар бизим аьскершилеримизди куьшли эм берк эткен.
Сол согыста олар дослык, саткыншылык деген не зат экенин коьргенлер. Оларды бир зат та енъип, сындырып болмады – 1941-45-нши йыллардагы согыстынъ баьтирлерин.
Шихджамал Джалил увылы Шихжамалов согыска Дагестан Республикасынынъ Куркент авылыннан кеткен, Берлинге дейим кара явды кувган. Онынъ акында эс буьгуьнлерде балалары, уныклары саклайдылар.

Солардынъ бириси – Ставрополь крайынынъ Нефтекум районынынъ Коясыл авылынынъ яшавшысы Артур Бинамудин увылы Шихжамалов.
– Меним атайым – баьтир, мен оны ман оьктемсиймен, ол мага йигерликтинъ, намыслыктынъ коьрими болады, – дейди Артур. Ол оьзи Коясыл авылында тувыпоьскен, мектебте ийги окыйтаганлардынъ сырасында эди, йогары белгилерге химия эм биология окув сабакларын билетаган болган. Артур Шихжамалов оьз бактысын медицина ман байланыстырмага бала заманнан алып ниет этетаган болган эм Кисловодск каласында медициналык колледжин битирген. Артур Шихжамалов (позывнойы Док-5) – согыс самбо бойынша спорт мастери. Спорт пан авылда каьрлеп баслады, студент йылларында «Старт» спортшколасына юрген, дзюдо ман каьр шеккен.
Армияда Артур самбо кебине коьшеди. Эр борышын ол Североморск каласында, Сырт флотынынъ тенъиз авиациясында куллык эткен. Армиядан сонъ правосаклав органларында, пожарныйлар боьлигинде куткарувшы болып каьрлеген. Сонъында Россия Коршалав министерствосы ман контракт туьзип, ВДВ сырасында баслап ротадынъ
фельдшери, сонъ батальоннынъ медициналык пунктынынъ етекшиси болып ислеген.

Сол заманнан бери 13 йыл кетти. СВО ерине бириншилердинъ арасында келди. Кыйынлы заманлар эди. Мага Артур йиберген суьвретлердинъ арасында онынъ Россия Баьтири, бизим республикамыздынъ йигити Нурмагомед Гаджимагомедов пан туьскени бар эди.
Сорав бермей болмадым.
– Биз ювык дослар эдик. Рязань каласында училищеди биткен сонъ Нурмагомед, яс лейтенант болып, бизим батальонга келди. Баслап взвод командири болды, сонъында ротады етекшиледи. Кызыксынувларымыз ортак эди, спорт, бирдей ойлар. Сол зат бизди шынты йолдаслар этти. Нурмагомед баьтирлерше ян берди, биз оны дайымларга юреклеримизде саклаякпыз, – деп айтады оьз согыс йолдасы акында Артур Шихжамалов.
Артурдынъ коькирегинде коьплеген согыс орденлери, медальлери, омырав белгилери яркырайдылар – «За Отвагу», «Медаль Суворова», I эм II дережели «За Воинскую
доблесть», «Участник Военной операции в Сирии», «За службу на Северном Кавказе», «Ветеран боевых действий», «За Ратную службу», крест «Народный фронт», «85 лет
ВДВ», «Десантное братство», «XXII зимние олимпийские игры в 2014 году в г.Сочи» РФ Президентининъ эстеликли медали. Бу баргылар аьскершидинъ баьтирлигин шайытлайдылар. Оьзининъ согыста кайтип йигитлерше согысканын айтпайды Артур. Мен оьзим онынъ акында билдим. Россия армиясынынъ прапорщиги эм десант-штурмовой
батальонынынъ медпунктынынъ етекшиси Артур Шихжамалов ислейтаган полк явдынъ атылувынынъ астында калган болган. Сол атылувларга да карамастан, Артур
яраланганларга биринши ярдамды этип турган эм согыс майданнан 17 йолдасларын шыгарып, кавыфсызлы ерге аькеткен. Сол согысувда Артур оьзи де яраланган аягына
эм басына, болса да ол оьз борышын толысынша толтырган.

Артурдынъ ата-анасы Бинамудин эм Женслу Шихжамаловлар студент йылларында Затеречный еринде танысканлар, аьел курып, Коясыл авылында яшап баслаганлар. Женслу Шихжамалова авылда «Оьзимиздикилерди тасламаймыз» (Своих не бросаем) куьбининъ волонтеры болады.
Артур аьлиги заманда согыстан кайтып, фронттагы ясларга коьмек этеди. Онынъ кесписи – тынышлы, аьлейи мен увылларын Шамильди эм Исламды, кызын Камилады тербиялайды. Уьйкенлери педагогикалык университетинде окыйды. Атасындай болып, увыллары спорт пан каьрлейдилер, олар экеви де Россия, Ставрополь крайы,
округы бойынша кудо спорт кебинде чемпионлар боладылар. Артур Шихжамаловка уьйкен атайы намыслыктынъ, баьтирликтинъ коьрими болады. Энъ де кыйынлы заманларда ол кайтип атайы фашистлер мен куьресип, енъгенин эсине алады. Биз де енъермиз, баскалай болмас. Коршалавшыларымыздынъ артында – уллы элимиз.
Г.Бекмуратова.
Суьвретлерде: Уллы Аталык согысынынъ ветераны Ш.Шихжамалов; СВО ветераны А.Шихжамалов эм Россия Баьтири Н.Гаджимагомедов.