Яс аьдем. Онынъ алдында мынъ ашык йоллар. Ол алдына салган мыратларына йигерли абытын алады. Бу куьнги яс аьдемнинъ мырсатлары боьтен де коьп: янъы технологиялар, соны ман ол туьрли социаллык тармакларга киреди, оьзине керекли билдируьвлер мен пайдаланады…
«Талаплы болган инсан – ол кайсы ерде де талаплы». Сол соьзлер коьп заманлар артта айтылган болса да, бу куьнлерде де куватын йоймайды.
Аьли меним соьзим сондай талаплы, оьзининъ кызыксынувы бойынша билимге ымтылатаган кыз – Азиза Бекмуратова акында.
Мен Азизады тувганлы бери таныдым десем, оьтирик болмас. Эсимде онынъ мектебке дейим, ашык соьйлеп те болмайтаган заманында, «Юлдуз» балалар бавынынъ тербияланувшысы болып, сонда болган конкурста биринши орынды алган. Сол заман онынъ кайдай окувшы болаягы белгили эди.
Биринши караска – бек каьмбил, терен ойлы окувшы. Онынъ атын мен коьп ерлерде ийгилик пен айтылып эситемен эм бу куьн талаплы кызды, газета окувшысы да танымага керек деген ойым ман, оьз макаламды язбага токтастым. Тек янъыларда Азиза Дагестан Республикасынынъ Аькимбасы Сергей Меликовтынъ колыннан Сый грамота алып келди. Айтып озайым, уьстимиздеги йыл, баьримизге де белгили, Уллы Аталык согысы биткенли 80 йыл толды эм РФ Президенти мен Элди коршалавшыдынъ йылы деп те белгиленген, соны ман байланыслы болып, коьп шаралар Россия, республика кезегинде оьткериледилер. Бу оьзгериске багысланып, республикада Язувшылар союзы ман уйгынланган «Аталыктынъ коршалавшыларына багысланады» деген шарадынъ «Мен оьктемсиймен, мен айтарман» деген ятлав окув номинациясында оьзи язган ятлавды окып, биринши орынга Азиза Бекмуратова тийисли болган.
Дагестан Республикасынынъ Язувшылар союзынынъ председатели Марина Ахмедова Азизадынъ ятлав окыганы акында булай дейди:
– Окувшы ятлавдынъ аьр бир сыдырасын терен ойы ман, юрек сезими мен окыды. Туврасын айтканда, ятлавды соьйтип окув – оьнер, – деди ол.
Азиза Амирбек кызы бу куьнлерде Ногай районымыздынъ А-Х.Джанибеков атындагы мектебининъ 9-ншы класс окувшысы болады, ол 6-ншы класс окувшысы заманында, Россия кезегинде оьткерилген «Бизим тарих» яслар проектлери шарасында «Эссе» номинациясында биринши дережели лауреаты болган эди.
Бу куьн онынъ алдында сынавлар, соларды да Азиза тийисли аьлде оьтеегине шек йок. Мен болсам, ога уьстинликлерди йорайман.
«Сонъгы занъ» байрамында да Азиза Бекмуратовадынъ аты айтылды эм ол ийги окувы, туьрли шараларда белсен катнасувы уьшин грамота ман белгиленди. Онынъ алдында аьли де эки окув йылы, сол мектеб йыллары ишинде аьли де уьстинликлер, етимислер коьп болсынлар, мыратлар толсын, биз де Азиза ман бирге онынъ енъуьвлерине суьйинейик.
Г.Курганова.
Суьвретте: А.Бекмуратова ДР Язувшылар союзынынъ председатели М.Ахмедова ман.