Дагестаннынъ Ногай районы еринде курал айынынъ 28-нши – 30-ншы  куьнлеринде «Авдарыс» – ат уьстинде куьресуьв миллет спорт кеби бойынша Савлайроссиялык турнир болып оьтти.
Россия халкларынынъ Бирлик йылынынъ сыйына озгарылып, коьшпели халклар ваькиллерининъ Кыргызстанда болып оьтеек Савдуныялык ойынларына элимиздинъ йыйылма командасын кеплев мыратта куллык юритуьвде ийги деген спортсменлерди айырувдынъ энъ ызгы кесеги болды.
Турнирди уйгынлавшылар – Ногай районынынъ Куьнбатар авыл администрациясы, «Ат-спорт индустриядынъ эм миллет спорт кеплерининъ оьрленуьв орталыгы» АНО, «ТаймырИнвест» ООО компаниясынынъ официаллык спонсоры эм «Татарстан Республикасынынъ «конное многоборье» бойынша Федерациясы» РОО.
Биринши куьн конакларга эм турнир катнасувшыларына концерт уйгынланып коьрсетилди. Каравшылар алдында «Айланай» патшалык ногай фольклор-этнографиялык ансамбли, йыравшылар Эдиге Куруптурсунов, Абуддин Нурлубаев эм Даниял Исакаев, солай ок Астраханьнен келген артистлер оьз оьнерлерин коьрсеттилер. Турнирден алдын Ислам Сатыровтынъ «Авдарыс» деген документальлик фильмы коьрсетилди.