Ногай районынынъ Кунбатар авылында коькек айынынъ 24-25-нши куьнлеринде Россия Баьтири Рафик Кадырбулатовтынъ эсине багысланып, бокс
бойынша йылсайынлык турнир озгарылаяк.
Рафик Кадырбулатовтынъ эстелиги Терекли-Мектеб авылындагы Баьтирлер Аллеясында орынласкан. Баьтир Астрахань областининъ Приволжский районынынъ Пойменный поселогында тувып-оьскен. 1994-нши йылда эр борышын толтырмага шыкыртылган, МВД иш аьскерлерининъ «Росич» отрядында мергин болып куллык эткен.
1995-нши йылдынъ коькек айынынъ 18-нши куьнинде отрядтынъ аьскершилери корсалавга туьседилер. Рафик Кадырбулатов сол согысувда 12 боевиклерди
оьлтирген. Каты яраланган болса да, согысувды токтатпаган. Есирге туьспес уьшин граната ман оьзин де, уьш боевиклерди де аткан. Ога Россия Баьтири деген ат берилген (оьлгеннен сонъ).
Турнир уйгынлавшылары болып Москва каласынынынъ «Ногай общинасы», Ногай районынынъ «Яслык» яслар орталыгы, «село Терекли-Мектеб»,
«сельсовет Арсланбековский», «село Кунбатар», «село Кумли», «сельсовет Карасувский», «сельсовет Ортатюбинский» авыл поселениелери шыктылар.
Россия спортынынъ мастери, ярыслардынъ бас тоьрешиси Рашид Янгазиевтинъ айтувы ман, Ногай районында республикамыздынъ туьрли калаларыннан эм районларыннан, солай ок баска ерлерден катнасувшылар эм конаклар болаяк. Солардынъ ишинде Ставрополь крайынынъ Канглы авылыннан спортсменлер де бар. Рашид Янгазиев бокс суьювшилерди баьтирдинъ эсине сый этпеге эм катнасувшыларды коьтергишлемеге шакырды.
Э.Кожаева.