Уьстимиздеги йылдынъ тамбыз айынынъ 1-нши куьнинде Халклар ара балаларды коршалав куьнине багысланып, Ногай районынынъ Терекли-Мектеб авылында Ногай халк патшалык саз алатлар язгы клубынынъ алдында «Балалык – ол биз!» деген ярык маданият-спорт шарасы йогары коьнъилде уйгынланып озды. Эртеннен алып районнынъ яс яшавшыларына шынты байрамды сезбеге амаллары
болдылар.
Шара Терекли-Мектеб авыл администрациясынынъ аькимбасы эм балалар уьшин байрамнынъ спонсоры Марат Кулунчаковтынъ кутлав соьзиннен басланды. Ол оьз соьзинде оьсип келеятырган несилге наьсипли яшаганын, Элининъ шынты патриотлары болып оьскенин эм оьз амалларын эм
яратувшылык куьш-куватын яшавга шыгарып келуьвде, оларга кайсы ягыннан да ярдамласпага керегин белгилеп озды. Саьбийлерди Халклар ара балаларды коршалав куьни мен кутлай келип, ол берк ден савлыкты, етимисти, онъайлыкты йорады. Баска болып, авылдынъ яс яшавшыларын эм онынъ конакларын Сраждин Батыров атындагы Терекли-Мектеб авыл саният мектебининъ окытувшысы Боранбийке Коккезова да шыгып кутлады. Солай болып, Сраждин Батыров атындагы балалар саният мектеби мен уйгынланган «2025-нши йыл –Шоьл тавыслары» деген район бойынша яс
вокалистлер ярысынынъ енъуьвшилери оьз оьнерлери мен боьлистилер. Оннан сонъ Боранбийке Коккезова ярыс енъуьвшилерине тийисли баргыларын тапшырды.
Солай болып, шатлыклы байрамды оьзининъ биюв оьнерлери мен Рабият Елакаевадынъ етекшилиги астында Балалар яратувшылык уьйининъ «Юлдызлар» биюв ансамблининъ катнасувшылары да ярасыкладылар. Сол куьн саьбийлерге аниматорлар ман бай эм кызыклы программасы да аьзирлен-
ген эди. Байрам бойынша балалар туьрли ойынларында, викториналарда, ярысларда,
биювлерде, ятлавлар окып базласувда, йыр йырлавда, юмаклар шешуьвде белсенли катнастылар. Байрам шараларында эм ярысларда катнаскан базласувларда енъген балаларга баргылар, савгалар, тегин мороженое, таьтли сувлар берилди.
Солай болып, спорт шараларын суьювшилерге де Шора Баьтир атындагы стадионында эм Ф.Капельгородский атындагы паркында орынласкан спорт майданында волейбол, футбол бойынша тунирлери шатлыклы аьлде озгарылдылар. Айтпага, байрамнынъ барысында Ногай районы бойын-
ша яшавшыларды социаллык ягыннан канагатлав орталыгынынъ специалистлери мен балаларга стадионда завыклы стартлары, тетиклерде базласувлары, асфальтте суьврет ясав ярыслары да уйгынланып оздылар.
Сол куьн балаларга авыл маданият уьйининъ алдында орынласкан аттракционда да завыклы ойнамага амал берилди.
Балалар уьйлерине байрамнан наьсипли, йогары коьнъилде кайттылар. Шатлыклы шарадынъ барысында сав куьн бойы саь-бийлердинъ завыклы эм наьсипли куьлкияйнаган юзлерин, суьйиништен йылтыраган коьзлерин коьрмеге болаяк эди. Соьйтип, шарады уйгынлавшыларынынъ эм спонсор-
ларынынъ байрамга йыйылган аьр бир саьбийдинъ коьнъилин коьтермеге шалысувлары босына кетпеди. Сол затка шайыт – аьр бир саьбийдинъ наьсипли юзи, суьйиништен йылтыраган коьзлери, ашык коьнъили.
Г.Нурдинова,
РФ Журналистлер союзынынъ агзасы.
Суьвретте: шарадан коьринис