Бу йылдынъ коькек айынынъ басында Нефтекум районынынъ Коясыл авылынынъ маданият уьйинде оьзгерисли шара – Навруз байрамы уйгынланып озды. Байрамды хош алув ниетте «Ногай маданиятынынъ асабалыгы» деген аты ман Нефтекум кала округынынъ бес маданият ошаклары, айтпага, Новкус- Артезиан, Махмуд-Мектеб, Тукуй-Мектеб, Зункар, Коясыл социал-маданият биригуьвлери оьз миллет азбарларын уйгынлап коьрсеттилер. Аьр бир миллет азбарын ногайлардынъ уьйшиликте кулланган бурынгы алатлары, колдан этилген усталыклары эм туьрли ногай миллет аслары ярасыклады. Аьр бир маданият ошагы байрамга йыйылган конакларын ногай шай ман хош коьрип алды.
Байрамнынъ экинши кесеги каравшылардынъ уьйкен залынынъ сахнасында оьтти. Фестиваль катнасувшылары энъ ийги художестволык номерлерин аьзирлеген эдилер. Шарага келгенлердинъ коьнъилин ногай тилинде эм патриотлык йырлары, Кавказ халкларынынъ усташа биювлери коьтерди. Шатлыклы байрам конакларынынъ сырасын СВО еринде катнасувшылары, олардынъ кардаш-тувганлары, волонтёрлар, баска болып, Ерли ислери бойынша управление етекшиси Виталий Борзых, Нефтекумск бойынша регионаллык миллет-маданият автономиясынынъ председатели Артур Ибрагимов, Ставрополь крайынынъ Нефтекум муниципаллык округы бойынша Дума депутаты Салих Бекмуратов, Коясыл авыл территориаллык боьлигининъ етекшиси Руфат Алимулаев туьздилер. Соьйтип, байрам йылы коьнъилде, дослык аьлде уйгынланып оьтти.
Суьвретте: шарадан коьринис.