Уьстимиздеги йылдынъ коькек айынынъ 17-18-нши куьнлеринде Карашай-Шеркеш Республикасында КЧР халк язувшысы, РФ маданиятынынъ ат казанган куллыкшысы,
кара соьз устасы, шаир, ногай адабиятынынъ белгили ваькили Иса Капаевтинъ 75 йыллыгына багысланган белгили язувшылардынъ, шаирлердинъ ортакшылык этуьви мен шатлыклы шаралар уйгынланып оздылар. Биринши куьн Черкесск каласында оьткен шатлыклы «Единая Россия» ямагатлык коьтергишлев штабында оьткен язувшылар йыйынында Иса Капаевтинъ шыгармаларынынъ китап выставкасы эм филология илмилерининъ докторы, карашай-балкар эм ногай филологиясынынъ профессоры Н.Х.Суюновадынъ «Иса Капаев. Диалектика творчества» монография-
сынынъ презентациясы уйгынланып озды. Сол ок куьн Карашай-Шеркеш Республикасынынъ Патшалык филармониясында мерекешидинъ яратувшылыгына багысланган «Акыйкатты ясырманъыз, эгер сиз оны билетаган болсанъыз» деген спектакли де сахнага шыгарылып коьрсетилди. Сол программа бойынша Сырт-Кавказ республикасынынъ белгили аьрекетшилери, Дагестан Республикасынынъ Ногай драмалык театрынынъ артистлери ортакшылык эттилер. Кешликти шаир, Кавказ Язувшылар клубынынъ агзасы Зухра Булгарова юритти. Россия Язувшылар союзынынъ миллет маданиятлары бойынша председатели Валерий Латынин Россия Язувшылар союзынынъ биринши секретари Владимир Мединский эм Россия Язувшылар союзынынъ яваплы секретари Николай Ивановтынъ атыннан Иса Капаевти кутлады эм «Адабиятта
етимислери уьшин» деген сыйлы савгасын тапшырды. Язувшылар союзынынъ халклар ара ямагатынынъ председатели Юрий Коноплянников сыйлы мерекешиге «СССР Язувшылар союзынынъ 90 йыллыгына» деген мерекели медалин де тапшырды. Шатлы-
клы шара коькек айынынъ 18-нши куьнинде У.Д.Алиев атындагы Карашай-Шеркеш педагогикалык университетинде ректор Таусолтан Узденовтынъ етекшилиги мен озды.
Шарага мерекешиди кутламага, йогары окув ошагынынъ студентлери, окытувшылары, куллыкшылары эм Карачаевск кала яшавшылары, конаклары язувшылар ман йолыгы-
ста ортакшылык этпеге келген эдилер. Йолыгыстынъ барысында йыйылганлар аьлиги заманнынъ адабияты, коьшируьв аьрекети, китап баспаланувы эм сондай баска маьнели затлардынъ акында хабарладылар. Конаклар адабиятка оьз йоллары, шыгармаларыннан кесеклерди окып эситтирдилер. Йолыгыста филология илмилерининъ докторы,карашай-балкар эм ногай филологиясынынъ профессоры Н.Х.Суюновадынъ «Иса Капаев. Диа-
лектика творчества» деген язувшыдынъ коьп яклы яратувшылыгын баьри ягыннан да тергелген монографиясынынъ презентациясы да озды.
Сол куьнлерде озган адабият байрамы халклардынъ шынты дослыгына эм бирлигине айланды.
Суьвретте: шарадан коьринис.
