Илми мен ис казна капы ашкандай

Ногай район орталык китапханасында ногай ярыкландырувшылардынъ, ногай адабиатынынъ негизин салувшылардынъ мерекелерине багысланып шаралар оьттилер. Уьстимиздеги йылдынъ навруз айында окытувшы, ногай фольклорын йыйнавшы эм тергевши Абдул-Хамид Джанибековка – 145 йыл, совет ногай поэзиясынынъ классиги, коьшируьвши, окытувшы Муса Курманалиевке 130 йыл толаяк эди. Соны ман байланыста ногай район китапханасында эм онынъ авыллардагы филиалларында кызыклы шаралар уйгынландылар.

Янъыларда, Навруз айынынъ 18-нши куьнинде, орталык район китапханасынынъ бас библиографы Сапихан Курпаева Кадрия атындагы мектебининъ 10-ншы «б» классынынъ окувшыларына Абдул-Хамид Шаршембиевич Джанибеков, Муса Курманалиевич Курманалиев – ногай халктынъ ярыкландырушылары» деген китапхана дерисин озгарды. Ол балаларга уллы ногай ярыкландырувшылардынъ яшав эм яратувшылык йолы акында хабарлады. Кадрия атындагы мектебининъ ана тил эм адабият дерисининъ окытувшысы Мархаба Мансурова окувшыларга А.-Х.Джанибеков пан М.Курманалиев латин алфавити негизинде биринши ногай алфавитин, биринши ногай китаплерин эм «Элиппе» букварин туьзгенлери акында айтты.

Шарага «Илми мен ис казна капы ашкандай» деп аталган китап выставкасы аьзирленген эди. Окувшылар ярыкландырувшылардынъ баьри несиллер балаларына пайдасы уьйкен болган насихатларын окымага амаллы болдылар. Деристе «Юреклерде дайымларга сакланар» деген видео — презентация коьрсетилди. «Тувган Элим», «Бизден уьлги», «Ана соьзи», «Суьедилер баласын» деген ятлавларды 9-ншы «а» класс окувшылары Аиша Байманбетова ман Медина Аблезова, 8-нши «б» класс окувшысы Хадиджа Биймурзаева эм 5-нши класс окувшысы Аиша Алыпкашева окыдылар.