Уллы Сраждин Батыров – суьвретши, этнограф яйнаган язлыктынъ, табиат янланып баслаган куьнлердинъ бирисинде дуныяга энген. Онынъ эткен иси оьлимсиз, тагы да эм тагы да кайтадан туваягын белгилеви мен байланыслы болар деп ойлайман. Сондай язлыктынъ ярык куьнлеринде йыл сайын белгили ногай суьвретши Осман Суюндиков, оьз окытувшысынынъ эстелигине багыслап, суьвретлерининъ выставкасын озгарады.
Янъыларда да Терекли-Мектеб авылындагы Халк яратувшылык орталыгынынъ фойесинде Осман Индрали увылынынъ ызгы заман ясаган суьвретлерининъ выставкасы ашылды. Сога багысланган шатлыклы шарага Россиядынъ эм Дагестаннынъ ат казанган маданият куллыкшылары Яхья Кудайбердиев эм Нарбике Муталлапова, Ногай район администрациясынынъ аькимбасынынъ орынбасары Мурат Шадиев, Халк яратувшылык орталыгынынъ етекшиси Солтанмурат Караянов, Сраждин Батыров атындагы саниятлар мектебининъ етекшиси Анвар Аджибаев, Астрахань каласыннан «Тулпар» уьлгили халк биюв ансамблининъ катнасувшылары эм олардынъ етекшилери Дамир Абдрахманов, Диляра Кутламбетова, Ленара Кадралиева, авыл ясуьйкенлери эм баскалар келдилер.
Йыйылганлар Осман Индрали увылынынъ ислери мен таныстылар. Онынъ «Бет ашар», «Базарга», «Кешки мезгил сыйыр савув», «Артезиан» эм баска суьвретлери выставка катнасувшыларына, йыйылган яс несилге, бурынгыдан салам аькелгендей болып, сол йыллардагы халкымыздынъ яшавын, оьнерин коьрсетти. Нарбике Муталлапова ясларга Сраждин Батыровтынъ, онынъ эткен куллыгы акында хабарлады. Сонъ ол Осман Суюндиковка 15 йылдан бери С.Батыровтынъ эстелигине суьвретлер выставкасын озгаратаганы уьшин уьйкен разылыгын билдирди. Композитор Яхья Кудайбердиев, Сраждин Батыров эм баска зейинли ногай аьдемлер мен байланыслы болган эскеруьвлери мен боьлисип, ясларды халкы ман эм халкы уьшин яшамага, онынъ онъайлыгы уьшин куллык этпеге шакырды. Мурат Шадиев казаклар, татарлар, ногайлар – бизим баьримиздинъ де ата-бабаларымыз ортак эм тилимиз бир экенин белгилеп, оларга тилди билмеге шакырув этти.
Шарада катнаскан «Тулпар» биюв ансамблининъ катнасувшылары уьйкен эс этип, аьр бир шыгып соьйлегенди тынъладылар, солай ок сукланув карс кагув ман олар суьвретши Осман Суюндиков пан таныстылар. Суьвретши болса, оларга оьз ислери эм ойлары акында айтып озды.
Н.Кожаева.
Суьвретте: выстакадан коьринис.