Аьр йыл сайын коькек айынынъ баслапкы куьнлеринде ногай миллетли халк саният тармагында Сраждин Батыровты эскередилер, неге десе сондай талаплы инсанымыз бу куьнлерде дуныя юзине энген эди. Сраждин Самедин увылы Батыров – аты кенъ белгили инсан, ога берилген илхам
баасыз. Оьзи суьвретши, язувшы, биювши, тигуьвши… Онынъ оьнер сырасын аьли де бардырмага болады. Талаплы аьдем. Ер юзинде ога берилген заман болжалы узын тувыл эди, ама онынъ халкына калдырганын, булай аьдем юз йыллык яшав оьмири берилген болса да, этип уьлгирмес эди.
Сраждин Батыровка багысланган шаралар ишинде, уьстимиздеги йылдынъ коькек айынынъ 11-нши куьнинде Ногай районымыздынъ орталыгында ерлескен уьлке танув музейинде «Сраждин – оьз халкынынъ увылы» деп аталган кешлик озды. Соны Ногай район орталык китапханасы ман музей куллыкшылары уйгынлап озгардылар. Кешликтинъ юритуьв программасы уьстинде китапхана куллыкшысы Сапихан Курпаева ислеген. Ол оьзи сол шарады да юритти. Бу куьн мунда конак болып
Сраждин мен яшав йолында тар байланыслы болган, оны ман бир аьрекетти эткен, онынъ ызын ызлаган аьдемлер шакырылдылар. Оьзек те, ол аьдемлердинъ кызыклы хабарлавларына шайытлыкты Кадрия атындагы орта мектебининъ 8 «б» класс окувшылары оьзлерининъ класс етекшиси Марина Межитова ман эттилер. Шарада болган аьдемлер бу куьн музей
куллыкшылары ман аьзирленген, талаплы саниятшымыздынъ коллары ман этилген куллыклар выставкасын да карадылар. Мунда автордынъ суьвретлери, туьрли миллет ансамбль уьшин тигилген костюмлер эскизлери коьрсетилдилер. Яс аьдемлерге сондай шаралар уьйкен мырсатлар бередилер.
Китапхана куллыкшылары болса, онынъ акында, оьзи язган асарлар бар китаплер выставкасын уйгынлаганлар. «Талаплы инсан аьр кайсы ерде де талаплы» деген соьз тек Сраждинге каратылып
айтылгандай коьринеди. Оны таныганлар хабарларын неши саьатлеп, куьнлеп тынъламага болады, неге десе онынъ кыска болжаллы яшав оьмири айлак кызыклы оьткен. Онынъ аты ногай саниятында, маданиятында оьмирлер сакланаяк, онынъ аты алтын аьриплер мен тек ногайлардынъ тувыл, савлай Сырт Кавказ тарихинде язылып калган… Бу куьн озган шарада болган яс аьдемлердинъ коьзлерине карасанъ кызыксынувды, сукланувды коьрмей болмайсынъ. Сол тувыл ма оькинишсиз оьткен оьмир деген, эгер сеннен сонъ да, сенинъ эткенлеринъ халк ишинде яшаса…
Кешлик бек етимисли оьтти, келген конакларга уьйкен разылык соьзин музей етекшиси Каирбек Бальгишиев те каратты, ол оьз ойлары ман, эскеруьвлери мен де Сраждин акында боьлисти.
Г.Сагиндикова,
РФ Журналистлер союзынынынъ агзасы.
Суьвретте: кешлик катнасувшылары.