Аьр дайым да коьмек этпеге, кыйынлы заманларда коьтергишлемеге эм сеним савкатламага аьзир аьдемлер – Социаллык куллыкшыларынынъ кеспи байрамына багысланган шатлыклы шарады КЦСОН етекшиси Хамидулла Абдулвагапович Саитов йогары кеспи усталыгы эм иске яваплылыгы уьшин куллыкшыларга каратылган разылык соьзлери
мен баслады. Орталык етекшиси олар эсли аьдемлер мен бирге кайгыратаганларын, суьйинетаганларын эм дайым да олар ман бирге экенин белгиледи. Оьз соьзинде Ногай район аькимбасынынъ орынбасары Мурат Шадиев, социаллык куллыкшыларынынъ ямагат уьшин куллыгынынъ маьнелигин белгилеп, олардынъ иси акында уьйкен разылык пан районымыздынъ эсли аьдемлери айтатаганын коьп кере эситкенин билдирди. ДР Ямагат палатасынынъ агзасы, район Хатын-кызлар советининъ председатели Асият Манкаевадынъ соьзлери аьр биревдинъ юрегине етти, ол мунда йыйылганлардынъ сырасындагы СВО катнасувшыларынынъ аналарына, хатынларына шыдамлык эм куьш йорады.
Байрамнынъ оьзеги болды баргылар тапшырув мезгили. Коьпйыллык эм намыслы иси, Дагестан Республикасынынъ яшавшыларын социаллык коршалав тармагында байыр етимислери уьшин ДР Ис эм социаллык оьрленуьвининъ министерствосыннан Сый грамоталар Марина Отегеновага, Роза Исмаиловага, Кайтархан Кокеновага, Альбина Магомедовага, Муртазали Алиевке, Насият Межитова тапшырылды.
Солай ок бу куьн Ногай район администрациясыннан эм Яшавшыларды социаллык канагатлав комплексли орталыгыннан да баргылар болды, солай болып сегиз куллыкшыга материаллык коьтергишлев де этилинди. Аьр бир куллыкшыдынъ баргысына савлай ис коллектив суьйинди эм аьр биревге савга тапшырылган мезгилде каты карс кагылды.
Шатлыклы кезектен сонъ, биювлер эм ойынлар басландылар. Байрам иелерине ДР ат казанган маданият куллыкшысы, уста юритуьвши Хамид Якубов йырлар савкатлап, шарадынъ ийгилигин арттырды. Бу куьн коьп заманга шатлык иелерининъ эсинде сакланар.
Нурият Кожаева.
Суьвретте: савгалав мезгили.