Янъыларда математика сабагыннан республика бойынша 5–6-ншы класс окувшыларына П.Л.Чебышёв атындагы XV олимпиададынъ регионлар ара кезеги уйгынланып озды. Россия мектеблерининъ окувшылары сондай базласувларда етимисли тамамлары ман йыйы баскаланып келедилер. Айтпага, сол билимлендируьв шарада Тарумов районынынъ НовоДмитриевка авыл орта мектебининъ 6-ншы класс окувшысы Амин Нукаев П.Л.Чебышёв атындагы олимпиададынъ баргы иеси болды.
Амин Нукаев математика бойынша илмиси мен кызыксынган талаплы саьбийлерди аянлайтаган олимпиададынъ баьри кезеклерин де оьткен. Сол олимпиада бир неше кезектен туьзилген эди. Айтпага, окувшылар баслап мектеб, оннан сонъ, муниципаллык, регион бойынша эм тамамында финал кезеклерин оьттилер. Амин сол кезеклердинъ савлайын да оьтип, терен билимлерин коьрсетип, математика сабагыннан кыйын эсапларын шешип, йогары тамамларын коьрсетти. Сонъгы тамамлав кезегинде яс баргы иелерининъ санына кирди. Аминнинъ уьстинлигинде онынъ оьзининъ тек тиресуьвлигиннен, шалыскырлыгыннан баска, НовоДмитриевка авыл орта мектебининъ ис коллективининъ биргелес аьрекетлеви де, Нукаевлердинъ аьелининъ коьтергишлеви де маьнели орынды тутты.
Аминнинъ ата-анасы увылынынъ кызыксынувын коьтергишлеп, ога анъ-акыл яктан оьрленип барувына баьри ийги аьллерин де туьзип келдилер. Ястынъ П.Л.Чебышев атындагы олимпиадада енъуьви Аминнинъ алдында янъы амаллар ашады: айтпага, окувшы яста математика окув сабагы бойынша йогары дережели базласувларында ортакшылык этпеге, талаплы балалар уьшин билимлендируьв орталыкларында катнаспага, математика окув сабагын келеекте терен уьйренмеге эп бар. Сол уьстинлик ога келеектеги етисуьвлер йолында маьнели абыт болаягына соьз йок.
Аминнинъ етимиси онынъ окув йолдасларын билимге ымтылысын оьстирмеге коьнъиллендиреди. Буьгуьнлерде сол енъуьв илмиге суьйим, мырадынъа ымтылыс, тиресуьвлик – ол туьрли интеллектуаллык майданларында етимиске аькелетаганы акында ашык коьрсетти.
Биз де Аминге келеекте де бийик етимислерин, математика окув сабагы дуныясында кызыклы эсапларын, туьрли ашылувларын йораймыз. Йолынъ етимиске дайым ашык болсын, Амин!
Г.Нурдинова.
Суьвретте: енъуьвши Амин Нукаев.
