Уллы Аталык согысы элимиз уьшин каты сынав болды. Аьскершилеримиздинъ алдышы сызыкта коьрсеткен йигитлиги, тылда ис баьтирлиги, ярык келеектегиге сеними – бу баьри зат та янларын аямай курманлык эткенлердинъ баасы ман етискен енъуьвдинъ негизи. Аьр бир аьелде мундай маьнели оьзгерислеринде ортакшылык эткен ювыклары акында тарихлери аьдуьвленип сакланадылар. Бу куьнлерде олардынъ несиллери – согыс спецоперация катнасувшылары, Аталыгы алдында оьз борышын намыслы толтырувы ман, оьрметли аьдетлерин бардырадылар.
Сондай йигитлеримиздинъ бириси – асылы ман Кизляр районынынъ Нововладимирское авылынынъ яшавшысы Биболат Русланович Нургишиев. Мектеб йылларында ол оьз яшавын аьскершилик службасы ман байланыстырмага токтас алды. Аьелде алган тербия яста шынты патриот сезимлерин кепледи. Согыс эм ис ветераны энеси Юзефа Ималиевна Суюновадынъ Уллы Аталык согысынынъ авырлыгы акында хабарлары, онынъ патриотизми, Элине уьйкен суьйими ясты коьнъилендирди эм ога сав яшавына
уьлги болды. Неонацистлер патшалыгымыздынъ межелерине янасканда, ол, яс янын аямай, коркынышты мутып, согыс спецоперация юрген ерге Элининъ йогарындагы таза
коьгин коршаламага йол алды. 2022-нши йыдынъ кырк кийик айынынъ ишинде Биболат Русланович «Бейбарс» позывнойы ман согыс спецоперация юрген ерине
йиберилди. Енъуьвди ювыклатып келгени. коьрсеткен йигитлиги, йигерлиги уьшин «За спасение погибавших», «За боевые отличия» эм «Участник СВО» медальлерине тийисли этилген. Оькинишке, 2025-нши йылдынъ курал айынынъ 9-ншы куьнинде гвардиядынъ киши сержанты Биболат Нургишиев аьскер борышын толтырувда ян берди. Оьлгеннен сонъ Йигитлик ордени мен савгаланган. Онынъ аты тарихте шынты йигитликтинъ эм Элине алаллыктынъ уьлгиси болып дайымга орын табар.
Баска бир ердесимиз – Ибрагим Юльманбетович Картакаев. Кизляр районынынъ Новокрестьяновка авыл яшавшысы. Ол Ростов областинде аьзирлик коьрип, Россия кызыксынувларын оьз эрки мен коршаламага кетти. Ол «Кыпшак» позывнойы ман Донецк еринде явдынъ техникасын эм тирев пунктларын йок этуьвде катнасты. Ибрагим, онынъ коьплеген замандасларындай болып, оьз атайынынъ, Исмаил Коккезович Картакаевтинъ баслаган исин бардырды. Ибрагимнинъ атайы согыс йолын снайперразведчик болып, совет калаларын босатып, Германияга дейим де еткен. Коьрсеткен баьтирлиги уьшин ол ян берген сонъ Йигитлик орденине тийисли этилген. Ол оьсип келеятырган несиллерге ярык уьлги, патшалыгынынъ кызыксынувларын яклаган Элининъ данъклы коршалавшысы болып калды.
Караногай районыннан Уллы Аталык согысына 2500 ердеслеримиз йолланганлар, солардынъ ишиннен 300 аьдем – уьйкен болмаган Кумлы авылыннан. Кайбиревлерине дав майданда калмага, баскаларына уьйине омыравына савгалар илип кайтпага бакты буйырды.
Олардынъ арасында Уллы Аталык согысынынъ катнасувшысы Мутаир Кереевич Кутлакаев те бар. Онда ол «Ветерок» деген аты ман согыс йолын оьтеди. 1943-нши йыл каты
яраланады, госпитальде эмленген сонъ, тагы да явды согып баслайды.
Согыстан сонъ Мутаир Кереевич тувган колхозына кайтып, йылкышы болып куллык эткен. Согыстан сонъ, бузылган хозяйстводы курувда белсенли катнасып келген. Ол
ян косагы ман тогыз балалы уьйкен аьелин оьстиргенлер. Атайы, нагашатайы Мутаир акында ийги эстелик онынъ уныкларын эм йиенлерин коьнъиллендирмей болмадылар, Элине авыр шакта олар шетте карап турмадылар. Уныклары дайым ога тенълесип келдилер. Согыста коьрсеткен йигитликлери уьшин согыс ветераны Мутаир Кутлакаев Аталык согысынынъ II дережели орденине, «За боевые заслуги» медалине тийисли этилген. Онынъ уныгы, рядовой Заир Кутлакаев, мектебти тамамлаган сонъ, эр борышын Ленинград областинде оьткен.
Оннан сонъ сегиз айлар службасын Украина ман межелескен Белгород областинде бардырган. 2022-нши йылдынъ караша айында алдына салынган борышларын яваплы толтырганы уьшин «Участнику специальной военной операции» медалине тийисли этилген. 2024-нши йылдынъ коькек айынынъ ишинде Ногай районынынъ Калинин авыл
яшавшылары, ветераннынъ йиенлери, агалы-инилер Муслим, Рустам Алиевлер бирге СВО юрген ерге Элин коршаламага йол алдылар.
Ветераннынъ йиеншери Алимурат Йигитлик орденининъ толы кавалери болып, Эли уьшин яс янын курман этти. Буьгуьнлерде Муслим эм Рустам СВО юрген ерде согыс
борышларын толтырып келедилер.
Уллы Енъуьв акында эстелик – заманлардынъ янлы байланысы.
Сонынъ уьшин сол эстеликти, совет халкынынъ йигитлигининъ уллылыгын анъламага ярдамласып, яс несилге асабалыкты коьшируьв бек маьнели.
Г.Нурдинова.
Суьвретлерде: согыс ветеранлары И.Картакаев, М.Кутлакаев.
