Уьстимиздеги йылдынъ курал айынынъ баслапкы куьнлеринде Ногай районымыздынъ Карагас авылынынъ мектебининъ азбарында, мунда окып, билим алган, аьлиги заманларда юрип турган согыс спецоперациясында катнасып, йигитлерше ян берген баьтирлерге эстелик тактасы салынды.
Баьтир атка тийисли болган йигитлер, сол атты олар яшав оьмирлерининъ кыскарувы ман алдылар. Тек окыган мектебининъ тувыл, савлай элдинъ тарихинде Исламбек Шабановтынъ, Артур Круптурсуновтынъ, Арсланбек Азизовтынъ атлары, болаттай берк аьриплер мен язылып калаяк. Аьдем яшаган шаклы, тарих те болаяк. Сонда олардынъ атлары да тураяклар.
Биз йогарыда белгилеген йигитлер уьшеви де Йигитлик орденининъ иелери (оьлгеннен сонъ берилген) боладылар.
Оьмирленди олардынъ атлары оьзлери окыган мектебинде. Бу оьзгерисли шарага Ногай район Депутатлар Йыйынынынъ председатели Р. Байманбетов (эстелик тактасы онынъ баславы ман болды), Ногай район аькимбасынынъ орынбасарлары: М. Шадиев, Р. Шангереев, авыл аькимбасы М.Капашов, ямагат организацияларынынъ етекшилери, авыл яшавшылары, Йигитлик орденининъ иелерининъ ата-аналары, ювыклары келген эдилер.
Шара Россия Федерациясынынъ гимни шалынувы ман басланды. Оннан сонъ «Элди саклавшы» ТОКС отрядынынъ активистлери бу йигитлер акында йыйнаган билдируьвлери мен боьлистилер.
– Бизим арамызда куьнле-куьнлик яшавларын бардырган йигитлер–Исламбек, Артур эм Арсланбек. Олар биз окып турган мектебте окыганлар, аьли биз аяк баскан ерлерде олардынъ да абытлары алынган, бизим футбол майданымызда олар да, бир ойсыз, топ тепкенлер… Оькинишке, бу куьн олар дав майданда ян бердилер… Ойланган ойлар, салынган мыратлар толмай калдылар… Буландай йигитлердинъ куьллединъ атылувыннан оьмирлери кыскарды. Кайгылы хабар ювыкларына, авыр билдируьв танысларга, йок соьз сол кайгыды юмсайтарга… Ама бизим борыш – Эс. Олар яшар, эгер олар акта эс болса… – деген соьзлер сол билдируьвлерден.
Бу куьн йыйылган конаклар алдында Ногай район аькимбасынынъ орынбасарлары М. Шадиев, Р. Шангереев, Билимлендируьв боьлигининъ етекшиси А. Межитов, Хатын-кызлар советининъ председатели А. Манкаева, Карагас авыл аькимбасы М. Капашов, район Чернобыльшилер союзынынъ председатели Р. Кунтувганов, Афганшылар союзынынъ председатели С. Култаев шыгып, СВО катнасувшылары акында ийги соьзлерин айтып, олар Элге кыйын заманда биринши болып, коршалавдынъ алдында турдылар деген ортак ойларын айттылар.
Бу куьнги оьзгерис – мемориаллык такталардынъ ашылувы – йигитлерше ян бергенлерге сый, аьр бир соьйлеген аьдем де сонынъ уьйкен маьнеси барын белгиледилер.
Оьз выпускниклери акында йылы эскеруьвлери мен мектеб етекшиси Насипхан Багудин кызы Шураева да боьлисти, окув йылларында йигитлердинъ класс етекшилери де оьзлерининъ йылы соьзлерин айтпай болмадылар.
Эстелик тактасын ашув ыхтыярын Йигитлик орденлерининъ иелерининъ ата-аналарына, ювыкларына, Ногай район Депутатлар Йыйынынынъ председатели Р. Байманбетовка, СВО катнасувшылары А. Ярикбаевке, А. Култаевке бердилер.
Ашылган эстелик тактасынынъ алдында окувшылар Альбина Джамалова, Джаннет Махмудова ятлав окыдылар, ДР ат казанган артисткасы З. Аджигеримова эм 2-нши класс окувшысы А. Отемисова йыр йырладылар, «Лашынлар» биюв ансамблининъ агзалары эм 9-ншы класс окувшылары ортак флешмоб эттилер.
Заманлар оьтер, мектебтинъ окувшылары да авысар, яс окытувшылар да келер, ама эс болып калар бу куьн ашылган эстелик тактасы, аьр бир бу мектебте окыган окувшылар Исламбек Шабановтынъ, Артур Круптурсуновтынъ, Арсланбек Азизовтынъ атларын эслеринде саклар, олардынъ йигитлиги коьплерге ийги коьрим болып калар…
Бу мектебте окыган йигитлердинъ атлары оьмирленди…
Бу куьн йигитлердинъ яшаган уьйлерине де эстелик такта илинди.
Галима Сагиндикова,
РФ Журналистлер союзынынъ агзасы.
Суьвретте: эстелик тактасы.