А-Х.Джанибеков атындагы мектебининъ окувшылары Уллы Енъуьвдинъ 80-йыллыгына багысланган шатлыклы линейкасында эм «Оьлимсиз полк» Савлайроссиялык акциясында ортакшылык эттилер. Бу акция Уллы Аталык согысы эм Элин босатув уьшин яшавын аямай согыскан аьр бир аьскерши акында эсти саклав уьшин озгарылады.
Эстелик касында колларында аталарынынъ, атайларынынъ портретлери мен окытувшылар, окувшылар, олардынъ ата-аналары эм конаклар йыйылдылар. Шатлыклы линейка Енъуьв байрагынынъ копиясын шыгарув ман ашылды. Шарада баьтирлер, совет халкынынъ сол йылларда шеккен азабы, кайдай баа ман Енъуьв келгени акында айтылды.
Линейка барысында согыс катнасувшысынынъ увылы, КПРФ РК секретари, район Ясуьйкенлер советининъ председатели Шатемир Мунгишиев, согыс ветеранынынъ кызы, ДР Ямагат палатасынынъ агзасы, район Хатын-кызлар советининъ председатели Асият Манкаева, ветеран уныгы, согыс спецоперация барысында коьрсеткен йигитлиги эм эрлиги уьшин Жуков, Суворов медальлери мен савгаланган СВО катнасувшысы Арсен Ярикбаев шыгып соьйледилер. Шатемир Мунгишиев окувшыларга согыс йылларында совет халкы Коммунистлер партиясынынъ етекшилеви мен енъгенин эсинде сакламага тилек салды. Асият Манкаева бизим ата-бабаларымыздынъ йигитлиги эм аьлиги заманнынъ баьтирлери СВО катнасувшыларынынъ сыйына белгиленген Аталык коршалавшылар йылы несиллер байланысын коьрсететаганын айтты. Арсен Ярикбаев енъуьвши атайлардынъ эсине тийисли болмага керегин белгиледи.
Шатемир Мунгишиев КПРФ Ногай райкомыннан мектеб етекшисине эм окытувшыларга – Курасхан Ярикбаевага, Барият Шинмурзаевага, Курманбике Оразбаевага, Марина Межитовага эм Йолманбет Шандавовка «Уллы Енъуьвге 80 йыл» медалин тапшырды.
Шарада «Сенинъ йигитлигинъ мутылмаган» республикалык ятлав окув конкурсынынъ савгашысы Алтынай Хозбулатова Расул Гамзатовтынъ «Нас двадцать миллионов» деген ятлавын яттан айтты.
Шатлыклы линейкадан сонъ, окытувшылар эм савлай мектеб окувшылары атайларынынъ портретлери мен Ф.Капельгородский атындагы паркы эм Орталык стадионы ман согыс йырларын йырлап, абытладылар. Сол, оьзек те, бизди оьктемситпей болмады.
«Оьлимсиз полк» акциясы Уллы Аталык согысы акында эс аьр бир аьдемнинъ юрегинде яшайтаганынынъ эм несилден несилге коьшетаганынынъ яркын шайыты болды.
Нурият Кожаева.
Суьвретте: линейкадан коьринис.