Россияда Авыл хозяйство эм асыллав промышленность куллыкшылар куьни шатлыклы аьлде белгиленип озды. Янъыларда Дагестан Республикасынынъ аграрлы орталыгы деп саналатаган Кизляр районында авыл хозяйство тармагы бойынша куллыкшыларын да сол кеспи байрамы ман шатлыклы аьлде кутлап белгиледилер. Аьлиги заманда аграрийлердинъ авыл хозяйстволык ислери кайнаган шагы барады, айтпага, дуьги, ясылша йыйнав, авыл хозяйстволык малларына туьрли азык аьзирлев ислери белсенли юредилер, баска болып, куьзлик культураларын шашув заманы да басланган. Авыл куллыкшыларын ислерин толтырувдан айырмас уьшин, Кизляр район Авыл хозяйстволык управлениесининъ етекшиси Разияхан Алилова исшилерди, ис ерлерине барып, кеспилик байрамы ман кутлады. Ол разылык соьзлерин «Цветковский» СПК, «Мареновский» КФХ куллыкшыларына, байыр предприниматели Муминат Абакаровага, «Сириус» ООО, баска болып, Цветковский авылынынъ ясылша ман каьрлевшилерине де каратты. Оннан сонъ кутлав соьзлери «Кизлярагрокомплекс» ОАО аграрийлерине де багысландылар. Кизляр районынынъ аькимбасы Аким Микировтынъ атыннан йыйылганларды кеспилик байрамы ман район администрация аькимбасынынъ орынбасары Зарема Агакшиева да кутлады: – Бу куьн сизинъ исинъизге эм аьрекетинъизге алал болып калувынъыз уьшин разылыгымызды билдирмеге ийги амал тувды. Сиз – районымыздынъ оьрленуьвининъ негизи, сизинъ куьш салувынъыз аркалы азык-туьлик кавыфсызлыгы эм онъайлыгы канагатланып келеди. Аьр йыл сайын тармак куллыкшылары тийисли тамамларына етисип келедилер. Сизинъ шалысувларынъыз аркалы биз алдыга сенимли барамыз, авыл ерлерин оьрлендиремиз, янъы ис орынларын ашамыз», – деди ол оьз кутлав соьзинде. Оннан сонъ шатлыклы аьлде савгалар тапшырылды. Агропромышленный комплексинде яваплы ис аьрекети уьшин эм Авыл хозяйство эм асыллав промышленность куллыкшыларын кеспилик куьнин байрамшылав ман байланыста, муниципалитет аькимбасынынъ Разылык хатлары ман толтырма цехининъ усталары, суьт цехининъ куллыкшылары эм сондай коьплеген баскалар белгилендилер. Баска болып, преприятиединъ Сый грамоталары айырым баскаланган мелиораторларга да тапшырылды. Шара, байрам аьлин туьзген эм аграрлы тармак куллыкшыларынынъ етимислерин белгилеген, Аверьяновка авыл маданият эм тыншаюв орталыгынынъ яратувшылык ис коллективлерининъ ярык оьнерлерин коьрсетуьвлери мен тамамланды. 

Суьвретте: шарадан коьринис.