Аьр кайсы инсан да оьз алдына баска болып яратылган. Яшав бойынша оьзининъ заманы ман, куьши мен санаспай, баскага ярдам этпеге аьзир аьдемлер мен де аз распаймыз. Соны мен тек сол аьдемге келисли ийгилик деп санамайман, ол оьзине атак казанув уьшин этпейди, сол онынъ юрек туьбиннен келетаган сезими, касиети ога оьзине онъайлы ерди калдырып, баска керексингенге кол коьмегин созбага амал да береди…
Россия Эли Украина еринде зорлыкка калган аьдемлерди коршалавга шыкканда, тувра айтканда, элимизге яв шапканда аьр кайсымыздынъ да шынты юзимиз коьринди, кыйынлыкка калганларга ярдам этпеге шыкканлар саны да аз болмады.
Ногай районымызда не шаклы яслар, ясуьйкенлер кайдай болса да, оьзлерининъ коьмегин этпеге асыктылар. Эл мен, авыл авыл ман косылып, не шаклы гуманитарлык юк аьзирленип, СВО ерине йиберилди, аьли де сол исти бардыратаган аьдемлеримиз бар, оларга савлык эм куьш.
Ясуьйкен аьдемлер акында айтатаган болсак, булай караганда, олар оьзлерининъ борышларын эл алдында да, балалары алдында да толтырганлар, ама олардынъ янлары да, куьшлери де бар, соны олар элдинъ онъайлыгы уьшин аьли де кулланмага боладылар эм кулланадылар. Йыллар ман йыйналган сулып та коьп ерлерде коьмекши де болады.
Аьли меним соьзим Терекли-Мектеб авыл еринде согыс спецоперациясында катнасатаган йигитлеримизге дайым коьмекке аьзир куьп акында, булар куьн сайын оьз куллыгын бардырадылар.
Сол куьптинъ белсен катнасувшылары ясуьйкен Нурбике Османова, Зарема Аджигельдиева, Румия Акболатова боладылар. Оьзек те, куьн сайын оларга ярдамга келетаган аьдемлер саны да бек коьп, ама аьр кайсы исти де уйгынлап, онълап болмага керек. Нурбике-абайдынъ билдируьвине коьре, ол биринши куьнлерден алып (СВО ярдам этилип басланганлай), сол исти уйгынлавшылар ишинде белсен катнасувшы Эльвира Бекмурзаева ман да ислеген, аьли уьшин олардынъ борышлары – аьскершилик шилтерлер согув.
– Шилтер согув да енъил ис тувыл, заман да, кол да керек болады, бир аьдем мен болатаган зат та тувыл. Оьзек те, биз бу куьнлерге дейим аз шилтер аьзирлемедик. Бизге ярдам эткен хатынлар да бар, айтпага, бир неше кере мектеблер куллыкшылары, окувшылары, авыл ясуьйкенлери орамлары ман йыйылысып келген заманлар да болдылар, материаллык ярдам да туьседи. Сол амалламалар аркалы алатлар сатылып алынадылар.
Кырда юрген ясларымыз уьшин янымыз авырыйды, элимизге тынышлык келсин деп ис аьрекетти бардырамыз. Сол зат тек пайдасын аькелсин деп этемиз, – дейди Нурбике-абай.
Элбетте, тыныш истен тувыл, куьн сайын, кыйын акынъды алмаягынъды билетаган болсанъ да, сол аьрекетти ызына еткермеге алгасап турув коьп зат акында айтады, аьдемнинъ шынты патриотлыгын коьрсетеди.
Аьли биз йогарыда белгилеген хатынлар эли уьшин, сонынъ онъайлыгы уьшин оьзлерининъ куьшлерин де, заманын да аямай юргенлерин коьремиз. Соны мунда бир неше кере келетаган хатынлар да коьредилер эм биледилер, оьзлери де олар ман биргелесип, «Ийгилик бар» дегенди коьрсетедилер.
Г.Курганова.
Суьвретте: Шилтер согув мезгилинде.