Ногай район администрациясынынъ кезекли аппарат йыйынынынъ катнасувшылары уьш соравды ортага салып ойластылар.
Йыйын алдында Чернобыль АЭС-нда болып оьткен баьлеказадынъ калдыкларын тайдырувда катнасувшыларынынъ Ногай район советининъ председатели Руслан Кунтувганов Россия «Чернобыль» Союзынынъ президенти В.Гришин атыннан Чернобыль АЭС-нда болып озган баьлеказадынъ 40 йыллыгы ман байланыста радиация алган гражданлардынъ ыхтыярларын эм закон яктан кызыксынувларын коршалав бойынша коьпйыллык белсен аьрекети уьшин Ногай район администрация аькимбасы Джамалутдин Эсиргеповка Разылык хат тапшырды.
Солай ок Р.Кунтувганов Ногай район Ямагат палатасынынъ председатели Эльмурза Саитовка, район Ветеранлар советининъ председатели Акманбет Сангишиевке,
район Хатын-кызлар советининъ председатели Асият Манкаевага, «сельсовет Карасувский», «сельсовет Ортатюбинский», «сельсовет Коктюбинский», «село ТереклиМектеб» СП МО аькимбасларына, Орта-Тоьбе, Уьй-Салган, БатырМурза авыл мектеблерининъ эм авыл маданият уьйлерининъ, китапханаларынынъ етекшилерине эм коьп баска йолдасларга эстеликли шараларды уйгынлаганы эм оьткергени уьшин разылыгын билдирди.
Оьсип келеяткан несиллерди патриотизм эм ян-коьнъил яктан тербиялавга, ортакроссиялык тыпаклыкты кеплендируьвге, миллетлер ара эм конфессиялар ара тынышлыкты эм макулласувлыкты беркитуьвге эткен салдарлы косымы уьшин «Дослар» телерадиокомпаниясынынъ директоры Даниял Исакаевке ДР Миллетлер
политикасы эм дин ислери бойынша министри атыннан Сый грамотасын Ногай район администрациясынынъ аькимбасынынъ орынбасары Рашид Шангереев тапшырды.
Муннан сонъ кенъестинъ куьн йосыгы бойынша «2026-ншы йылда район билимлендируьв организацияларында ОГЭ эм ЕГЭ сынавларды оьткеруьв бойынша билимлендируьв боьлигининъ куллыгы акында» деген доклад пан район билимлендируьв боьлигининъ начальниги Амирхан Межитов шыгып соьйледи.
2025-нши йылда «Ногайское райветуправление» ГБУ ислерининъ сырагылары акында Ногай район Ветеринар управлениесининъ етекшиси Кельдимурат Шамаровтынъ информациясы тынъланды.
Йыйыннынъ ызында сонынъ катнасувшылары алдында Россия МВД-нынъ Ногай район бойынша ГИБДД боьлигининъ начальниги Артур Манкаев «2026-ншы йылдынъ 4 айы ишинде Ногай районы еринде йол коьлик кателери яктан аьллер акында» деген билдируьви мен шыгып соьйледи.
Ызгы сорав бойынша бир неше коьтерилген маьселелер акында ис йорыгы ман айырым кепте ойласув оьткерилмеге токтасылды.
М.Юнусов.
