Россия Федерациясы, солай ок Дагестан Республикасы да, туьрли тармаклар бойынша: маданият, саният эм сондай баскалары болсын, патшалык ягыннан аьрекетшилерге коьтергишлев этеди.
Айтпага, туьрли проектлер яшавга шыгарыладылар, баргылар белгиленедилер. Маданият, саният, адабият пан каьр шегетаган инсанларды коьтергишлев уьшин Дагестан Республикасынынъ Аькимбасынынъ 264-нши номерли Указы 2014-нши йылдынъ декабрь айынынъ 3-нши куьнинде кабыл этилинип алынган. Сол Указ бу куьнлерде де оьз пайдасын береди. Аьр йыл сайын маданият, саният тармагында куллык эткен аьдемлер бир йыл узагында акшалай колтыклавга тийисли боладылар.
Янъыларда 2026-ншы йылга «Дагестан Республикасынынъ Аькимбасынынъ стипендиялары акында» деген Указы бойынша распоряжение ДР Аькимбасынынъ байыр сайтында баспаланды. Сол баргыга тийисли аьдемлер сырасында бизим ердеслеримиз – ДР ат казанган маданият куллыкшысы, шаир, язувшы, коьшируьвши, «Россия Язувшылар союзынынъ» агзасы, бизим ис йолдасымыз, Дагестан Республикасынынъ Язувшылар союзынынъ ногай секциясынынъ председатели Гульфира Абдулаким кызы Бекмуратова, «Айланай» патшалык фольклор-этнографиялык ансаблининъ токтастырувшы- балетмейстери, ДР ат казанган артисти Альмира Ораш кызы Тунгатарова да бар. Белгиленген аьдемлер бир йыл узагында акшалай коьтергишлев алаяклар.
Етискен уьстинлик ердеслеримизге ызгы болмасын, алдыда да тек оьрленуьвди эм оьсуьвди, ногайымыздынъ сыйлы атын армаганда да ийгилик пен ататканынъызды йораймыз.
Галима Сагиндикова.