Быйылдынъ 21-нши – 23-нши куьнлеринде Москвада «Россия» Миллет орталыгында «Киши Тувган ер – Россия куьши» деп аталып, Савлайроссиялык форум озгарылды. Ол – муниципаллык туьзилислер оьрленуьвине эм олардынъ элимиздинъ социал-экономикалык аьрекетинде туткан орынын беркитуьвге каратылып озгарылатаган йылсайынлык уьйкен оьлшемли оьзгерис.
Россия Президенти Владимир Путин форум катнасувшыларын хош коьрип алды эм оларды Ерли самоуправление куьни мен кутлады. Олардынъ баславлары элимизди беркитуьвде эм миллет мыратларга етисуьвде ярдамын тийгистеегине сенимлигин билдирди. Форум ерли самоуправление оьрленуьвинининъ Савлайроссиялык ассоциациясыынъ (ВАРМСУ) колтыклавы ман уйгынланды. Шарада савлай элимизден муниципалитетлер етекшилери, региональлик властьлер, бизнес ваькиллери эм экспертлер йолыгыстылар. Онда Ногай район етекшиси Джамалутдин Эсиргепов та ортакшылык этти. Ол белгилегенлей, форум, ерли самоуправление органларында куллык этетаганлар ман, сонъ оьз аьрекетинъе Уллы Енъуьвдинъ 80 йылына киритпеге болаяк ис сулып пан, боьлиспеге эм муниципаллык управлениесининъ ийги практикалары ман таныспага эп берди.