Янъыларда РФ Президенти Владимир Путин Дагестаннынъ Оьр судынынъ председатели Федор Щукинди регион етекшисининъ куллыгын кесек заманга юритуьвши этип беркитилгени акында указга кол салган. «Федор Вячеславович Щукинди, Дагестан аькимбасы этилинип сайланган инсан ис орынына туьскенше дейим, Дагестан Республикасынынъ куллыгын кесек заманга юритуьвши этип беркитпек», – деп айтылады документте. Указ кол салынган куьннен алып куьшине киреди.
Дагестан аькимбасы республикадынъ Халк йыйынынынъ депутатлары ман президент пен коьрсетилген кандидатлар арасыннан сайланады.
Федор Щукин
Федор Щукин 1976- ншы йылдынъ 4-нши августында Горьковский областининъ (аьлиги Нижегородский) Починки авылында тувган. 1997-нши йылда – Н.И.Лобачевский атындагы Нижегородской патшалык университетининъ юридический факультетин, 2002-нши йылда – «государственное и
муниципальное управление» кесписи бойынша Н.П.Огарев атындагы Мордовский патшалык университетин окып битирген. 2000-ншы йылда Нижегородский областининъ Починковский районынынъ Земской йыйынынынъ депутаты этилинип сайланган. Бир йылдан сонъ ол Починковский район судынынъ судьясы болды.
2013-нши йылдынъ ноябрь айында ол Нижегородский областининъ Семеновский район судынынъ председатели этилинип беркитилген. 2020-ншы йылдынъ ызында оьр
коьтерилип, Нижегородский область судынынъ аькимбасынынъ орынбасары болды. Сол ок йылдынъ май айында Россия Судьялар советининъ агзасы этилинип сайланган эм сол органнынъ нызамлык комиссиясынынъ сырасына кирген.
Быйылдынъ апрель айында Дагестан ерин сув алганнан сонъ, Щукин энъ зыян коьрген районларынынъ судларын айырым ис режимине коьширген. Ол солай ок материаллык зыянды тайдырув эм компенсация тоьлевлерди алув ман байланыслы соравларды тезлик пен ортага салып карамага, сол ис тийислисинше юритилгенине тергев салмага тапшырды.
Халк пайдалыгына намысы ман кыйын салганы патшалыгымыз ягыннан белгиленген: ол III дережели «За безупречное служение правосудию», «Россиядынъ Оьр судына 100 йыл», «Нижний Новгородтынъ 800 йыллыгынынъ эстелигине» деген медальлер мен савгаланган.
Дагестан етекшисининъ куллыгын кесек заманга юритуьвши этилинип беркитилген Федор Щукиннинъ айтувы ман, буьгуьнлерде ДР власть органларынынъ биринши эм
бас борышы – республика ерин сув алганы ман байланыста туьзилген авыр аьллер сырагыларын тайдырув уьстинде белсенлик пен законга келисте аьрекет этуьв.
Федор Щукин йолыгыслар эм кенъеслер озгармага планлайды, олардынъ графиги бу куьнлерде туьзилеек.
