Янъыларда Ногай районынынъ Терекли-Мектеб авылында Россия Баьтири Рафик Кадырбулатовтынъ эстелигине бокс бойынша Ашык турнир озгарылды. Оны Ногай район администрациясы, «село Терекли-Мектеб», «село Кунбатар», «сельсовет Арсланбековский» СП МО-лар, «Яслык» яслар орталыгы, Балалар-оьспир спорт мектеби эм «Ногай общинасы» региональлик ямагат организациясы (Москва каласы) уйгынладылар. Турнирде 6 командалардан 160-тан артык катнасувшылар ортакшылык эттилер, айтпага: Кабардино-Балкария Республикасы, Ставрополь крайынынъ Коясыл авылы, ДР-нынъ Хасавюрт каласы, Шешен Республикасынынъ Сары-Су авылы, Ногай районынынъ Карасу эм Терекли-Мектеб авыллары.
Турнирдинъ шатлыклы ашылувында Терекли-Мектеб авыл етекшиси Марат Кулунчаков, Ногай район Ямагат палатасынынъ председатели Эльмурза Саитов, район Ясуьйкенлер советининъ председатели Шатемир Мунгишиев, согыс урыслар катнасувшысы, Шамиль атындагы Сырт-Кавказ институтынынъ проректоры, «За военные заслуги» орденининъ, «Орден Почета» белгилерининъ иеси, тийисли тыншаювдагы полковник Алибек Мурзаев, «Яслык» яслар орталык етекшиси А.Шамбилов, «Ногайский район» МР депутатлар Йыйынынынъ депутаты Арслан Акбердиев, Ногай районынынъ Чернобыльшилер союзынынъ председатели Руслан Кунтувганов эм турнирдинъ специальлик конагы, бокс бойынша халклар ара классынынъ ат казанган спорт устасы, юниорлар ара Россия бириншилигининъ енъуьвшиси, Россиядынъ миллет йыйылма командасынынъ агзасы Рашид Янгазиев ортакшылык эттилер.
«Турнир уйгынлавшыларына эм баславшыларына баьтирлер акында эстеликти саклайтаганлары уьшин разылыгымды билдиремен. Ондай турнирлерде балалар тек спорт усталыкларын ийгилендируьвден баска болып, бизим Баьтиримиз Рафик Кадырбулатовдынъ йигитлик коьриминде оьзлеринде патриотизм сезимлерин тербиялайдылар», – деди Рашид Янгазиев.
Турнирден сонъ конаклар Баьтирлер Аллеясында болдылар эм Россия Баьтири Рафик Кадырбулатов бюсти туьбине шешекейлер байламын салдылар.
Турнир призерлары эм енъуьвшилери грамоталар ман, медальлер мен, кубоклар ман эм чемпион белбавы ман савгаландылар.
Ол Астрахань областининъ Пойменный поселогында тувган. 1994-нши йылдынъ ноябрь айында РФ Савытлы Куьшлер сырасына шакыртылган. Аьскерлик борышын РФ МВД-нынъ ишки аьскерлерининъ «Росич» спецназ отрядында оьткен.
1995-нши йылдынъ 18-нши апрелинде «Росич» отрядынынъ аьскершилер куьби Бамут туьбинде Лысая гора еринде яв курсавына туьседи. Рядовой Кадырбулатов, коршалавдынъ онъ ягын яба берип, явдын санына коьре артык болган куьшли шапкынлык этуьвин токтатып, согыс урысында 12 каракларды каты яраланып йок эткен. Есирге туьспес уьшин, граната ман уьш боевиклерди оьлтирип, оьзи де ян берген. Тувган ери – Пойменный поселогында койылган.
Россия Федерация Президентининъ 1996-ншы йылдынъ 20-ншы июлинде шыккан 1065-нши номерли Указы ман Рафик Кадырбулатовка Россия Федерациясынынъ Баьтири (оьлгеннен сонъ) деген йогары ат берилген. Россия иш ислер министрининъ буйырыгы ман (22-нши август 1997-нши йыл) ол Россия МВД-нынъ «Росич» спецназ отрядынынъ списогына дайымга киргистилген.
Астрахань областининъ Пойменный орта мектебине Рафик Кадырбулатовтынъ аты тагылган эм мектеб еринде онынъ бюсти ерлестирилген. Ногай районында солай ок Баьтирлер Аллеясында онынъ бюсти орынластырылган, Калининаул эм Ленинаул орамлары Россия Баьтири Рафик Кадырбулатовтынъ эстелигине онынъ атын юргистедилер.
Бизим хабаршы.