Дагестанда газ тармакларын косылыстырув бойынша Россия Президентининъ тапшырмасы толтырылады. Сонынъ акында янъыларда ДР Оькиметининъ кезекли кенъесинде республикадынъ патшалык муьлкин приватизациялав прогнозлы планы акында сорав ойласылганда соьз юритилген.
Дагестан Оькиметининъ Председатели Абдулмуслим Абдулмуслимов белгилегенлей, Дагестан еринде орынласкан газ тармакларын «Газпром» ПАО эсабына косув кереги акында РФ Президентининъ тапшырмасы бар. Соны ман байланыслы буьгуьнлерде яшавга шыгарылып турган ислер регионда газ бан канагатланувдынъ пайдалыгын эм берклигин арттырмага амал береек.
Дагестан Оькиметининъ вице-премьери, ер эм муьлклер катнасувлары бойынша министри Заур Эминов билдиргенлей, быйылдынъ прогнозлы планына республика ерлериндеги 4 газ тармакларынынъ объектлери киргистилмеге каралады: Махачкаладагы 2396 метр узынлыгы болган «НКО» ДЦК и ССХ» ГБУ, Курах районындагы 8652 метр, Ногай районынынъ Батыр-Мурза авылындагы 1152 метр эм Табасаран районындагы 3003 метр узынлыгы болган газопроводлары.
«Бу белгиленген 4 объектлерди сатув – ол 2025-нши йылдагы газ тармакларын косылыстырув бойынша куллыклардынъ биринши кезеги болады. Истинъ экинши кезеги быйыл куьзде яшавга шыгарылмага каралады, олай дегени, 62 газ объектлери сатылаяк. Соларды инвентаризациялав бойынша шаралар коьрилгенлер. Тек янъыларда бизге Газпромнан делегация келип кетти, сонынъ агзалары 62 газ тармакларын сатып алмага аьзир экенлигин билдиргенлер», – деген Заур Эминов.